Mwene gwomukunda Onamega moshitopolwa shaShana Immanuel Nandambo Paulus (Saulu) okwa ningi omuleli gopamuthigululwakalo omutitano, a hulitha omwedhi nguka.
Paulus okwa hulithile megumbo lye, mepipi lyomimvo tadhi fekelwa 80 nasha, uuyelele mboka kakwa li wa tseyika ethimbo ndyoka.
Elenga enene lyuUukwambi Herman Ndilimani Iipumbu okwa koleke eso
lyaPaulus koshikundaneki shika.
Ta ti Paulus okwa kala oshilyo shelelo lyUukwambi ethimbo ele lela.
“Otwa adhika keso lyombaadhilila, lyamwene gwomukunda gwetu Onamega. Eso lyaPaulus olya thigi po omwaka. Okwe tu thigila oluhepo poompito odhindji,” ta popi ngaaka.
Iipumbu okwa ti, eso ndyoka olye mu halutha noonkondo, ye opo a fumvike meme gwe oshiwike sha zi ko.
“Onda hokololelwa kutya, Paulus okwa li a tokelwa megumbo nokwa li a li uulalelo pamwe naakwanezimo ye. Anuwa okwali ayi mondunda a kalala nokonima yethimbo oya uvu mondunda tamu inyenge, sho aanegumbo ya kathika, omundhimba ashike ya adhamo,” ta popi nolukeno. Ta ti, Paulus okwali omumwayina onkene okushi okumutanga.
Ta popi ta ti, ita tanga ashike Paulus sho ke po nena, ihe ota popi onkalo ye mo shili.
“Paulus okwali omulumentu gwombili, omwiinekelwa oshowo omukwathi. Otwa kanitha omupukululi nomulongi gwetu. Sigo onena inandi mona uuwinayi waPaulus,” ta tanga nakusa ngaaka.
Iipumbu okwa ti, sha longwa oshapwa, naayihe otaye yi gandja miikaha yOmuwa.
Paulus okwathigiko omukulukadhi gwe, uunona oshowo aatekulu.
Omvo nguka ogwa piti ko noonkundana oombwinayi okuziilila momalelo gopamuthigululwakalo gomonooli.
Elelo lyOukwanyama olya kanitha elenga enene Amon Shipanga gomukunda Onamutai oshowo mwene gomukunda Efidi Lomulunga Simon Kaupa Mwatotele.
Elelo lyOndonga olya kanitha omalenga omanene Vilho Kamanya gomukunda Amuteya oshowo Kashona Ka Malulu gomukunda Ombulu
– vkaapanda@nepc.com.na