New Era Newspaper

New Era Epaper
Icon Collap
...
Home / Mwene gwosikola yopawumwene mOndangwa i idhipaga

Mwene gwosikola yopawumwene mOndangwa i idhipaga

2020-04-28  Victoria Kaapanda

Mwene gwosikola yopawumwene mOndangwa i idhipaga
Top of a Page

ONGWEDIVA –Omunangeshefa nomulongisikola keithano omvalele yaNigeria, okwa ikutha omwenyo sho a imangeleleke nongodhi, ongula yOmaandaha konima yegumbo lye.

Omugandji gwomawuyelele moshitopolwa shaShana Frieda Shikole okwa koleke kutya omulumentu nguka gwedhina Isiaka Ishola Lasisi Ajani, okwa hulitha potundi 06h00 yongula ohela mOndangwa.

Ajani okwa li oye mwene gwoskola yedhina African Star International School mOndangwa.  

“Otaku hokololwa kutya omulumentu ngoka, ina thiga a shanga kutya okwa ikuthila shike omwenyo,” Shikole ta ti ngaaka.

Shikole ta hokolola kutya Ajani ngoka a li a hokana omukiintu gwomuNigeria omukwawo, okwa li a adhika a sa nale, sho a imangelekele nongodhi. 

Kape na ngoka ta fekelwa meyikutho Mwenyo ndjoka, naakwanezimo ye oya tseyithilwa.

 Omakonakono gopolisi oge li metifa.

Nonande kakushiwike kutya omolwashike Ajani a ikuthila omwenyo, otaku hokololwa nakusa okwa idhipaga, esiku lya landula ndjoka osikola yakula ombapila ya za kongundu yavali yaanona haya sikola poskola ye, yeli 57. 

Mombapila ndjoka ya monika kuKundana, aavali ovali taya pula opo osikola yi shunithe pevi oshimaliwa shofuto yokomwedhi shaanona pethimbo lyepato. 

Aavali otaya ti aanona ihaya falwa we koshikola nobesa, yo ihaya li we posikola, oshoka paife ethimbo lyepato, onkene oya pula opo koshimaliwa ku kuthwe.

Aavali mboka oya nyenyeta ishewe kutya osikola ndjoka oya ndopa oku gandja ookalasa paludhi lwoe-learning ngaashi tashi ningwa koosikola odhindji dhopaumwene.

Miitsa yomanyenyeto mbyoka yili 12, omwa kwatelwa shoka aavali taya nyenyeta kutya osikola ihayi ihumbatele nawa aavali, iha ya pewa iipundi ya kuutumbe ngele ya talele po osikola, ndele ohaya kuutumbikwa ketaiyela, yo ishewe ina ya uthilwa okupopya naalongi yaanonana yawo. 

Aavali oya ningi omatilitho kutya otaya ka kutha onkatu ya gwedha po, inaa ya popya kutya oyoludhi luni, ngele osikola ina yi ya yamukula. 

Mboka ya li ye shi nakusa Ajani, oye mu hokolola onga omulongi omwaanawa, nokwa li kadhenga mokulonga oshilongwa shomwaalu. 

Taya ti osikola ye oya li yimwe yomoosikola ndhoka ihaadhi mono oshimaliwa sha gwedhwa po oku za kepangelo.

Ajani okwa hokololwa wo onga omulumenhtu omumweni, nomunamagano. 

Molwashoka aakwaAjani oye li meiteelo lyaaMuslema, otashi vulika a fumbikwe nena, ngele opolisi oya mana nomakonaakongo gayo.


2020-04-28  Victoria Kaapanda

Tags: Oshana
Share on social media
Bottom of a page