Festus Hamalwa
Omukainhu weedula 38 ou paife e li monghalo itai nuwa omeva ko-ICU moshipangelo shaShakati okwa ti ote livele ombedi eshi a dopa okulopota omushamane waye ou a kala noku mu hepeka.
Selma Nakanduungile a dja komukunda Ondando mOniipa moshitukulwa shaShikoto okwa lemanekwa komutwe nokombuda konima eshi vati a tetaulwa nomakatana komushamane waye.
Omushamane waye weedula 44 Joseph Iyambo, okwe limangeleka konima eshi a tetaula omuholike waye.
Pefimbo Kundana a talela po Nakanduungile koshipangelo shaShakati okwa hokolola ta ti kashi shi oshikando shotete ta dengwa komushamane waye shaashi okwa kala ha dengwa shito nokutukwa.
“Umwe womushiinda shange okwa kala nokulombwela nge opo ndi ka lopote keembelewa doukashikekookanhu kutya ohandi hepekwa ashike onda kala handi shi anye shaashi onda tila omushamane wange. Onghee paife ohandi livele ombedi kutya ngeno nda ningile eshi kwa li mushiinda shange ta lombwele nge,” Nakanduungile ta hokolola.
Okwa ti alushe ohava kala vehe na ombili meumbo nomushamane waye eshi hava kala tava tanguna nokulidengafana.
“Otwa hangika twa ninga oivike ivali inatu popya naye,” Nakanduungile ta ti.
Okwa hokolola ta ti okwa li va ya koshivilodalo namumwainakadona Osoondaxa ashike eshi osha eta opo omushamane waye a kale a handuka shaashi vati ine mu lekela kutya ota di mo meumbo.
“Konima eshi nda fika meumbo okudja koshivilodalo omushamane wange okwa tameka okutanguna. Okwa ti kutya oku na okulonga nge oshilongwa. Nokudja opo okwa kufa ekatana ndele ta tameka okutetaula nge komesho younona vetu ovo hava hangika meumbo,” ta hokolola.
Nakanduungile okwa ti okudja opo okwa tameka okukuwa mokule fiyo ovashiinda tave uya keumbo lavo nokonima ovashiinda ova lopotela opolifi.
Omushamane waye okwa faduka po diva ndele te ke limangeleka momuti u li mekove lambulavo.
Iyambo okwe lituwa e li meemhango konima eshi opolifi ya landula eemhadi daye.
Nakanduungile okwa twalwa koshipangelo shaNandjokwe nokonima okwa ka tuminwa koshipangelo shaShakati shaashi okwa li e li monghalo ii.
Okwa weda po ta ti omushamane waye okwa kala noku mu ningila omatilifo kutya ngeenge okwe mu lopota ote mu dipaa.
“Omushamane wange omukodi. Alushe oha kala ashike te lipula kutya ohandi ka nangalwa po kovalumenhu vamwe. Ke hole ngeenge handi popi novalumenhu vamwe ile novamwamememati,” ta hokolola.
Nakanduungile okwa ti ovahombola momudo 2016 nove na ounona vatatu hava di navo meumbo lavo.
Okwa kunghilila ovakainhu vakwao ovo va ninga oihakanwa yomahepeko omomaumbo opo vaha fye ohoni yoku ka lopota ovashamane vavo ngeenge tave va hepeke.
Kansela woshikandjohoololo shaNiipa Tulipohamba Nuunyango okwa ti ovaholafani otava longo oimbuluma tai tilifa oshiwana notai ulike efano lii.
“Ovaholafani nava xulife po okukala tave lidengele komesho younona vavo shaashi eshi otashi yandje oshihopaenwa shii unene tuu kounona voumati,” Kansela ta ti.
Okwa weda po ta ti eshi otashi piyaaneke yoo vali omadiladilo ounona shaashi ka shi li mondjila ngeenge okaana ka mona ina ta tetaulwa nokatana komesho ya ko.
“Oku lidengafana kaku shi ekandulepo lomukundu, okulikufa omweyo konima ngeenge omunhu a longa oshimbuluma kashi shi etokolo lomondjila ndele eshi otashi eta po omukundu kounona noshoyo kovakwapata vavo,” Nuunyango ta ti.
Minista youkashik kookanhu nonghalonawa yokaana Doreen Sioka okwa kunghilila ovaholafani opo va kale tava ka konga omakwafo kovaxungimwenyo, kopolifi ile kovafitaongalo ngeenge ve lihanga ve na omaupyakadi momakwatafano opaihole avo.
“Ovashiinda nava kale tava lopotele opolifi, mwene womukunda ile eembelewa detu doukashikekookanhu kombinga yovalumenhu ile ovakainhu tava hepeke ovanhu momaumbo. Omahepeko omomaumbo ayeshe naa lopotwe pefimbo opo oonakuninga oihakanwa va kale va kwafelwa diva,” Sioka ta ti.
Okwa weda po ta ti oshiwana nashi xulife po okukala sha mwena ngeenge tashi hepekwa momaumbo kovaholike vavo.
“Ovanhu nava longele kumwe okukondjifa omahepeko omomaumbo,” minista ta ti.