New Era Newspaper

New Era Epaper
Icon Collap
...
Home / Naku ye oshigongoti – Kansela Ndakunda

Naku ye oshigongoti – Kansela Ndakunda

2020-04-08  Loide Jason

Naku ye oshigongoti – Kansela Ndakunda

Loide Jason 

Kansela gwoshokandjohogololo shEngela osho wo oshilyo shOlaata Yopashigwana Jason Ndakunda okwa li a gandja ombili koshigwana konima yokavidio hoka ka li ka ihanene komalungula take mu ulike ta nu e li koluuli lwohauto ye yopaumwene, oshiningwanima shika osha li sha ningwa omutenya gwOmaandaha. Momaandaha kansela okwa li a kwatwa mokavidio poshiponga mOhangwena, moka a li a mbotsa ohauto yimwe konima.
“Otandi gandja ombili kombinga yaashoka sha ningwa ohela ngaashi tashi ulikwa mokavidio komalungula. Ondi ipa ombedhi moshinima shika nuuwinayi sha eta,” ta ti ngaaka.
Ndakunda okwa li a koleke kutya okavidio okoshili ashike oka li ka kuthwa kaatondi ye yopapolitika.
 “Onda li nokandooha koWindhoek Draught kaake na sha nonda li ashike nde ka tula kokana nda fa tandi nu opo ndi ngwangwaneke mboka ya li ya hala okuponokela ndje, taya ti anuwa onda kolwa. Kanda li nda kolwa, onda li ashike nda ngwangwana molwoshiponga osho wo engungo lyaantu mboka ya li ya hala okuponokela ndje,” ta fatulula ngaaka.
“Ngiika onda dhimbwa ashike okukutha mo okandooha mehauto ashike onde ka nwina kegumbo. Ondi na iikunwa ya gwana kegumbo na inandi teya ompango yokunwinwa moshigwana. Sho osho nda gandja ombili koshigwana sho nda ulika okandooha komangandja montaneho yaantu,” ta ti ngaaka.
Ta tsikile ta ti oye a eta oshiponga sho a li a ndopa okumona endhindhiliko lyomopate ashike ka li a kolwa. 
“Konima yoshiponga onda li nda dhengele omuntu gumwe a ile ndje po poshiponga oshoka onda li mengwangwano. Ohauto yandje oya li ya kuthwa po kopolisi nangashiingeyi oyi li momake gopolisi,” ta fatulula ngaaka.
Omupopiliko gwopolisi moshitopolwa shaHangwena Warrant Abner Itumba okwa li a koleke kutya oshipotha shokuhinga nuuhasha osha li sha patululwa notashi konaakonwa. Ta ti kansela ina mangwa po natango oshoka omakonaakono oge li petameko lela.
Ewaw lyaagundjuka lyongundu yoSwapo- Swapo Party Youth League (SPYL) oya li ya ti oya uva nayi kokavidio haka kaNdakunda ke li komalungula noya ti oya hala a gandje ombili koshigwana.


2020-04-08  Loide Jason

Tags: Ohangwena
Share on social media