Omulumentu ngoka a li a monika mokavidio komalungula gwopaungomba ta dhenge omuniilonga omukiintu gwomositola yedhina Pick n pay yokoGrove Mall mOsoondaha osho a mangwa e ta holoka mompangu yamangestrata moWindhoek ongula yohela.

Samuel Shikale okwa li a mangwa po ongula onene yEtine e ta falwa kompangu esiku ndyoka nokwa li a pewa a ifutile noondjindikila dha gwedhwa po. Nguka ota pangulilwa oshipotha shedhengagulo nelalakano lyoku ehameka omuntu kolutu. Okwa adhika aniwa pegumbo lye polukanda lwedhina Cimbebasia, e ta pewa a ifutile mo oshimaliwa shi thike pooN$3,000.

Ompangu oya li ya pula Shikale a kale a iyutha koondjindikila ndhoka sigo omomasiku 02 gaSeptemba sho ta ka galukila kompangu, ngele ine shi ninga nena iimaliwa ye mbyoka a futa otayi ka ninga yepangelo.
Dhimwe dhomomilandu dhoka dha tulwa po kompangu ongaashi kutya ina pitikwa nande okuza mo moWindhoek sigo oshikando shoka ta ka holoka mompangu.

“Omutamanekwa moshipotha shika okwa tegelelwa a kale a i ilopota lumwe moshiwike, ano Omaandaha kehe okuza ongula potundi 08h00 sigo 19h00 komukonaakoni gwoshipotha shoka,” osho ompangu ya tokola ngaaka.
Ompangu oyo tuu ndjoka okwa li ya tula po ondjindikila kutya omulumentu nguka ina pitikwa nande okulunduluka po pehala mpoka ha zi na ngele okwa hala oku shi ninga na kale a lombwela omukonaakoni gwoshipotha  muule womasiku ge li gaheyali omanga ina ninga omalunduluko ngoka.

Omulumentu ngoka okwa li a kalelwa po kohahende ye ndjoka ya ulike kutya ota futu ombooloha nena nota zi mo mokakuma. Oshipotha shoka osha undulilwa komeho nomakonaakono otaga tsikile moshinima shika.