ONGWEDIVA–Omulumentu gwoomvula 27 ngoka a li a tsu nokudhipaga kuume ke komiihole omukulu pamwe nomuholike gwe molwiikonene, taku popiwa kutya osha li oshiponikela shi nyanyaleka, okwa monika ondjo miipotha ine. Patrick Shuya Mesho okwa li a monika ondjo medhipago lyaRonnica Sipepiso Mashale pamwe nakuume ke komiihole Fredi Jona mesiku 01 Febuluali 2017 moKatima Mulilo, sha ningwa konima sho ya li ya topoka uule womwedhi naMashale. Mesho otaku popiwa anuwa a li a geye noonkondo sho a adha aaholathani mbaka aape mombete ndjoka ya li haya lala naMashale. Mesho, okwa li wo a patululilwa iipotha iyali yonkambadhala yedhipago sho anuwa a li a ponokele nokutsa oontaliyiho mbali. Ashike konima yethimbo iipotha mbyoka oya li ya lundululwa kompangu okuza konkambadhala yedhipago nokuninga iiponokela nelalakano lyoku ehameka omuntu kolutu. Shi ikwatelela kuumbangi wepangelo, Mesho naMashale oya li mekwatathano lyopaihole. Oombangi odha lombwele ompangu kutya ekwatathano lyaMesho naMashale olya li lya hulu pwa piti omwedhi manga oshiponga shoka inaashi holoka, ashike Mesho okwa popi kutya ye okwa li ashike a za po megumbo. Konima yomwedhi ya topoka, okwa galuka nokwa adha Mashale e li mombete nomulumentu gulwe (Jona). Okwa li anuwa a lombwelwa kuMashale kutya ekwatathano lyawo kali po we, naashoka oshe mu geyitha. Konima okwa yi kondingosho yi li pomudhingoloko ngoka gwoCowboy moka a adha Mashale naJona, osho wo kuume gomuukiintu gwedhina Lafalaza Nalufu.
Sipesiso okwa okwa li a yi konima yondingosho a ka talaleka, ashike Mesho okwe mu landulile ko noku mu tsa noombele olutu aluhe, konima okwa shuna mondingosho nokwa tameke okutsa Jona momutse nokombunda noku mu monitha oshiponga noonkondo. Okwa shuna ishewe konima yondingosho nokwa adha Sipepiso a lala mepandaanda. Otaku popiwa e mu adha a mona oshiponga, a lala egombe nota kondjo nuudhigu okufudha, ashike shoka inashi keelela Mesho opo e mu tse natango iikando ine mombunda.
Mashale opo a li a sile mpoka.
Shi ikwatelela kuumangi wagumwe, Mesho okwa li a galukile mondingosho nokutameka ta tidha ookasitoma ndhoka dha li tadhi kambadhala okufala Jona koshipangelo. Omanga yalwe ya li ye shi pondola okuza mokana konkoshi ngeyi, otaku popiwa omukiintu gumwe gwedhina Flora ngoka a li a humbata ohanana yoomvula mbali a li e mu ganda, naashoka osha li sha eta opo Mesho e mu tanaukile po nokuyelutha ombele e mu ukitha, ashike, okwa li a galuluka sho Flora a li e mu galikana. Nakulonga iimbuluma mbika okwa ka mangwa konima yethimbo.
Pethimbo lyegandjo lyegeelo lye ndyoka lya li lya ningwa mOshakati oshiwike sha zi ko, Mesho okwa li a ti ken a ondjo, oshoka okwa li monkalo ondhigu pamadhilaadhilo nokwa li a nwa epangwe pamwe niikolitha. Ta ti ka li a dhimbulula p osha ethimbo ndyoka, nokwa ka dhimbulukwa ashike sho a ka mangwa po esiku olyo tuu ndyoka. Ashike omupanguli Duard Kesslau okwa li a ekelehi omatompelo ngoka nokwa ti epangelo olya ulika kutya uumbangi wedhipago opo wu li wu na ondjundo.
“Omutamanekwa okwa li a homata oshilwitho sha nika oshiponga; okwa li a longitha oonkondo okutsana; iilalo oya li ya tsuwa kiilyo ya simana komalutu lwiihakanwa. Oonakusa ayehe oya tsuwa iikando oyindji, nanakudhipaga sho a tsu omuholike gwe omukulu pamwe nakuume ke omupe otashi ulike kutya okwa li oshiponokela shiikonene,” Kesslau ta ti ngaaka. Mesho ota ka pewa egeelo lye muNovemba.
- ashikololo@nepc.com.na