WINDHOEK-Omulumentu gwepipi lyopokati ngoka a li ta kondjo nomwenyo mokoma moshipangelo shaShakati sho a tsuwa moombati nombele molwongodhi yomekwamo osho a zi mo mokoma oshiwike shika.

Ndhoka odha li dha kwashilipalekwa komuhwahwameki gwiimbuluma noshowo omukoonakoni gwiimbuluma moshitopolwa shaMusati Deputy Commisioner Moses Simaho.

Simaho okwa hokolola kutya nonando Iitondoka Linus Alugongo Mandoza okwa za mo mokoma onkene ngaa natango e li moshipangelo moka ta mono uuhaku oshoka ina pola natango.

 Oshiningwanima shika osha holokele  pomukunda gwedhina  Oshikwawo polukanda ndoka lu li pomukunda gwedhina Iikokola  moshikandjohogololo shaTsandi moshitopolwa shaMusati.

Omugandjilombo nguka okwa li a dhenge omuthindo kutya aakwashigwana yaAngola mboka ngashingeyi taya pewa iilonga yomomagumbo monooli otaya longo iimbuluma e taya fadhuka po.

Simaho ndhika okwe dhi popi sho omulumentu gwepipi lyopokati a mbothagulwa noombele sho ya li taya kondjele ongodhi yopeke ano ocellphone petameko lyoshiwike shika.

 Nakulongelwa omuyonena nokutsuwa nombele  okwa tsuwa nombele yokapi moombati dhokolumoho shoka sha etitha nokuli opo a kale a ya mokoma. 

Uuyelele mboka wa gandjwa kuSimaho otawu ti kutya konima yoshiningwanima shika opolisi oya li ya kwata ethimbo okudhitika omutamanekwa nguka oshoka aniwa okwa li nale taningi oompangela dhokuya koshilongo shawo.
“Opolisi oya yi niihauto yi li ihetatu ya landula omutamanekwa nguka ya ya pondatu yongula ihe oye mu manga potundi ontine yokomatango. Ya adha nale u uka koongamba dhoshilongo a wape okutaaguluka a ye moshilongo shawo,” Simaho ta ti ngaaka.

Okwa tsikile ko ta ti ngele aatamanekwa mbaka ya tokola okuya moAngola ohashi kala oshidhigu kopolisi opo ya mangwe.
Okwa hokololwa kutya nakulongelwa omuyonena okwa li a ehama noonkondo nokwali a falwa kokoma koshipangelo shaShakati. 

Nakutsuwa nombele oye nee  Iitondoka Linus Alugongo Mandoza omvalele ya Iikokola moshikandjoholololo osho tuu shoka. Omanga omutamekwa oye Antonio Johaness Kaukukusha Nghilifaali Shimati omukalimo gwomomukunda ngoka gwa tumbulwa pombanda.

Nguka ota holoka mompangu yaMangestrata mOkahao mEtine lyoshiwike shika, naSimaho okwa ti ita vulu okupewa ombooloha oshoka oku na ompito yokumatuka po.