Uuministeli wIikwameni nEtonatelo lyOkoongamba owa ti otawi ikundu kutya otawu kwatha ngiini aanona ya Aangola yeli momapandaanda moshilongo.
Uuministeli tau ti, sha ikolelele kokatendo okatiheyali komumvo 1993, kekotampango lyaNamibia ontauki kehe ye ya moNamibia pakathimbo oyili metonatelo lyepangelo lyaNamibia.
Omukuluntu wilike muuministeli wIikwameni nEtonatelo lyOkoongamba Etienne Maritz okwa ti shoka oshinakugwanithawa shawo.
Ta fatulula kutya oyena ontseyo ya gwana kutya opena aanona yaAngola yeli kohi yomimvo omishona taya ende momapandaanda miitopolwa yokonoli omanga yali yena okukala yeli moosikola.
“Otuli metifa okukundathana naanambelewa kombelewa yaAngola mOshakati, nkene tuna okukandulapo omaupyakandhi ngoka,” ta fatulula ngaaka. Otaku hokololwa natango aanona mboka ya taalela omahepeko moNamibia sho taya longithwa iilonga yokoonyala momagumbo, omanga iimaliwa yawo tayi taambwa ko kwamboka ye ya kongele iilonga.
Okwa ndhindhillikwa kuna aaNamibia mboka ya ningi oongeshefa yoku kongela aanona mboka iilonga yomomagumbo.
Uministeli okwali wa yamukula ngaaka konima kwali wa pulwa koshifokundaneki shika ngele owuna ontseyo kombinga yaanona mboka taya ende momapandaanda naashoka taya vulu okuninga po okukandulapo uupyakandhi mboka.
Uunona Uuangola womimvo ndhili pevi lela, okuza pomimvo ntano okuya pombanda, owa taalela onkalo ondhigu, sho tau ende tau li momandoloma oshowo tau ende tau indile iikulya momapandaanda, miitopolwa yomonooli, omanga yamwe taya lala momahala itaaga hokitha.
Oshifokundaneki shika iiwike ya ziko, okwa li sha tsakaneke aanona yaAngola yomimvo tadhi tengenekwa okuza puntano sigo heyali, taya tondokele oohauto tandhi kankama kooha nopate mOshakati, opo wu landithe shoka wa humbata, ngele itau indile oshimaliwa shoku landa sha sho kulya.
Oshiwike shoka natango okanona kamwe kOkaangola okali ka lyatwa kohauto mOshakati, lwopOkatana Service, sho kwali taka taaguluka opate. Elago enene oka hupu no kali ka kamona uuhaku meendelelo.
Ayihe mbyoka otayi holoka omolwa onkalo yataalela aanona mboka, ya taaguluka okuza koshilongo shawo omolwa onkalo ndyoka ya nyayika, yondjala tayi ya tidha ko. Nonando taya tondokele moNamibia omolwa uuhupilo, ya pewe iilonga yoko make, shoka natango uupyakandhi uuna aanona mboka ya pewa iilonga moNamibia oshoka oye li kohi yomimvo, oyena okukala yeli moosikola.Shoka osha tali kako onga omahepeko, nonando oya hala okulonga ya mone oshimaliwa.
Uuministeli wokakwashikekookantu, owa ti, owuna ontseyo kombinga yonkalo yaanona mboka ye li mehalakano moondoolopa, Oshakati, Ondangwa nOngwediva.
“Uuministeli owu li metifa okukonakona nkene wuna okulonga nomandiki galwe miitopolwa moka, opo uupyakandhi mboka wataalela aanona mboka wu kandulwe po,” omupevi kuluntu muuministeli wokakwashike kookantu Martha Mbombo, ta fatulula ngaaka.
Ta ti, poonkatu ndhimwe ngaashi ndhoku tulwa moosikola, pa ekotampango lyaNamibia, aanona mboka oyena okukala yena oonzapo ndho mavalo, ndhoka kaayena, naamboka uupyakandhi wa gwedhwa ko. “Omapangelo gaali gaAngola naNamibia oga kala nokulongela kumwe omanga oshilongo inaashi manguluka, no taga tsikile okulongela kumwe okusila oshimpwiyu aantu yawo,’’ ta ti ngaaka. Kristophina Nakandungile omunambelewa yambindhindhi gwaNgoloneya gwoshitopolwa shaShana Elia Irimari okwa ti, ombelewa yoshitopolwa shaShana oya kambandhala okukwathela mpoka tayi vulu, ihe inashi kwathela sha.
“Kapena opologalama yili po nkene aAngola yena okuyambindhindhwa, sho shoka aantu mboka kayena nkene yena okuyambindhindhwa pethimbo ndika,” ta fatulula ngaaka.
Ta gwedhapo kutya nonando oya shunwe koshilongo shawo, konima yominute ndho ntumba, natango owuli mumwe nayo.
Ta ti, oshoka shoka sheya kutha koshilongo shawo inashi kandulwa po, onkene otashi ya hingiko natango.
– vkaapanda@nepc.com.na