Namport okwa yambidida ofikola Onaushe Combined school eshi a yandja eshina loku ninga eekopi, eli kwa li lili eshongo la taalelwa kofikola ei. Ofikola oya didilikwa ina omhumbwe yoikwafifo yofikola ngaashi eshina loku ninga eekopi nongulumambo.

Eshina eli la yandjwa olili pongushu yoshimaliwa N$45 000.

Onaushe Combined school oili moshikandjohoololo shaUuvudhiya, oyo imwe ina ounona vahapu va dja komuhoko wovahimba, nokomuhoko vovayelele. Ofikola ei oya kala ina oupyakadi ngee ya hala oku indjipaleka eembapila doinyangadalwa yovanafikola shaashi ka kwali pe na eshina.

Omudo 2020 ofikola ei okwa li ya longekida oshinyangadalwa opo i ongele oshimaliwa sho ku landa eshina eli, onghee ina i ka dula vali oku shininga molwa etukuko lombuto yoCovid-19.

Eshina eli ola tambulwa ko komupedukulunhufikola Martha Shapumba. Okwa ti okwa pandula unene oNamport eshi ya yambidida ofikola yavo, neshina olo la li lili eshongo linene.

“Mopaife ngaha ohatu kala hatu longo noupu ngeenge ha tu pe ovanafikola oinyangadalwa yofikola. Onghee paife oilonga oya ninga ipu, shaashi otashi tu pe omukumo opo tu kale hatu longo nondjungu,” Shapumba ta ti.

Okwa ti eshina ole ya pefimbo liwa shaashi okwa li lapumbiwa unene kofikola yavo.

Okwa indile ovanangeshefa ile ovaleli vopapolitika opo ve u ye va yambidide ofikola yavo shaashi ofikola oya pumbwa ongulumambo opo ovanafikola va kale tave lihongo noupu.

Omumbelewa a dja koNamport Kanisius Iidhongela okwa ti otava twikile nokukala tava yambidida eefikola edi dili momhumbwe yoikwafifo, shaashi ehongo ola fimana moshilongo.