Omukulunhu wehangano loMonica Gender Equality Human Right and Social Justice Shaanika Nashilongo ota hokolola kutya ovalumenhu navo ova ninga oihakanwa yokuhepekwa momaumbo kovakainhu vavo. 

Meenghundafana a ninga naKundana Nashilongo okwa hokolola ta ti omudo ou ombelewa yavo oya kala nokumona elopota dihapu dili kombinga yovalumenhu tava hepekwa keehonda davo. Okwa ti unene tuu ovalumenhu ava iha va longo vali ohava kala tava li tava pi momaumbo shaashi vati ohava kala tava tukwa, vo tava dengwa keehonda davo shaashi omunhu iha longo vali.

Ehangano eli ola totwa po nelalakano opo li kale tali kwafele ovanhu ava tava hepekwa momaumbo, nokukwashipaleka kutya omahepekafano okwa mona exulilo moshilongo.

Okwa ti ovalumenhu otava hepekwa unene ngeenge va kanifa oilonga, nombuto yoCovid-19 oya etela vahapu va kanife oilonga. Ta ti onakukanifa oulonga ava ovo tava nyenyeta unene tava ningilwa omahepeko kovakainhu momaumbo.

“Ngeenge oweya kombelewa yetu oto hange ovamelunhu tava hokolola nghee hava tilwa omeva mapya kovakainhu vavo, onghee eshi osha kala nokulopotelwa kombelewa yetu oikando ihapu,” Nashilongo ta ti.

Okwa ti ehangano loshikonga shavo ota li kwafele ovanhu aveshe tava ningilwa ominyonena momaumbo, omo mwatelwa nounona onghee ehangano eli ota likwashipeleke kutya ovanhu ove shi oufemba wavo ngeenge tashi ya pokuhepekwa.

Okwa denga omufindo ta ti ku keshe ou te kelihanga eli monghalo yokuhepekwa na kale a lopotela ombelewa yavo konomola yongodi ei 0813703332 ile oshiwana shi kale sha lopotela opolifi opo omahepeko oukashike kookanhu a kale axula po.

Nashilongo okwa ti ehangano lavo oha li yandje omaxungomweno kounona ile kovakulunhu tava hepekwa.

“Ngeenge omunhu ote ku ningile omahepeko ino mu dipaa nande ile umulemaneke, ndele lopotela ombelewa yetu meendelelo opo tu kale twa katukila omhunu te ku ningile omahepeko onghatu yopaveta,” Nashilongo ta ti.