Omukulunhu wehangano lokukondjifa omahepeko oukashikekookanhu loMonica Gender Equality, Human Ringhts noSocial Shaanika Nashilongo okwa ta ti ovanhu vamwe otava lilwa oshimaliwa yavo keendudu.
Okwa ti ombelewa yavo ohai kala i na ovanhu vahapu tava nyenyeta eshi valilwa oshimaliwa shavo keendudu efiku keshe.
Pefimbo a ninga eenghundafana naKundana Etitatu Nashilongo okwa popya ta ti unene tuu ovakainhu ovo vamwe va ninga oihakanwa vokukengelelwa keendudu eshi hava lilwa oshimaliwa shavo shihapu.
“Pombelewa yetu ngeenge owe ya po oto hange po ovanhu vangudumana ve u ya okulopota kombinga yoshimaliwa shavo eshi va hepifa okufuta eendudu,” Nashilongo ta ti.
Nashilongo okwa ti konima ngeenge ovanhu ova ka konga omakwafo keendu ihava mono elunduluko la sha, ashike ohava kala tava ti kutya ova hepifa oshimaliwa shavo shihapu eshi va kengelelwa.
Okwa popya ta ti ovanhu vamwe ova lopotela ombelewa yavo kutya ohava kala tava ningilwa omatilifo keendudu, tava fininikwa okufanekwa in ava djala oikutu.
“Oto hange omunhu ta ti okwa futa oshimaliwa shihapu shaashi vati okwa tila ondudu i tule efano laye komalungula, eli kwa li a fanekwa inadjala sha,” Nashilongo ta ti.
Nashilongo okwa ti ovanhu vamwe ohava lombwelwa eendjovo doipupulu keendudu kombinga yeehonda davo, omo vati to hange ovakainhu tava kendambala okufiya po eehonda davo shaashi valombwelwa oipupulu keendudu.
Okwa yelifa ta ti unene tuu eendudu edi hadi kala dili komalungula tadi pitindike oilonga ya do, odo dimwe da didilikwa da lile ovanhu oshimaliwa.
“Kapena ondudu yo shili hai kala komalungula tai pindike nghee hainyanyekela ovanhu, onghee oshiwana na shi kale sha kotokela eendudu odo hadi kala komalungu tadi ningi oipindi yoilonga yado yokunyanyekela,” Nashilongo ta ti.
Okwa ti ku keshe ou te kelihanga eli monghalo yokuhepekwa na kale a lopotela ombelewa yavo konomola yongodi ei 0812222077 ile oshiwana shi kale sha lopotela opolifi opo omahepeke oukashike kookanhu a kale axula po. Nashilongo okwa ti ehangano lavo oha li yandje nomaxungomweno kounona ile kovakulunhu tava hepekwa.