New Era Newspaper

New Era Epaper
Icon Collap
...
Home / Natango vahapu mOmundaungilo kave na oufemba

Natango vahapu mOmundaungilo kave na oufemba

2021-11-25  Festus Hamalwa

Natango vahapu mOmundaungilo kave na oufemba
Top of a Page

Kansela woshikandjohoololo shaMundaungilo Festus Ikanda  okwa ti ovanhu vahapu moshikandjohoololo shaye, va kwatela mo ovanafikola, fiyo opapa kave na omaufemba woshilongo.

Okwa ta ti eshi oshili eshongo linene shaashi ihava mono omauwa okudilila kepangelo. 

Ta ti ovanaifkola itava dulu okufutilwa ofikola, omanga ovadali vavo navo vene vehe na oufemba.

Ikanda okwa ti omikunda edi dili keengaba daNamibia naAngola odo unene dina omwaalu wovanhu uli pombada tava mono oixuna molwaashi kave na oufemba.

Kansela okwa ti ounona vamwe oveli meendodo da kula va pumbwa okuya koipupudilo yopombada ashike itava dulu okuya ko shaashi kavena sha oufemba ou tau va pitike okukala va tambulwa.

“Ounona vahapu ova dalelwa moshilongo, ashike ovadali vavo otava ti kutya kavena sha oshimaliwa sholefa shokuya keembelewa doikwameni opo va ka kongele ounona oufemba. Naashi osha eta opo ounona vahapu va kale tava mono oixuna konghalo yoku e na oufemba,” Ikanda  ta ti.

Okwa ti otai indile opo oumisteli woikwameni neetonatelo lokeengamba u kale tau tula po omandiki okukala taa yandje oufemba momikunda shaashi ovakwashiwana vamwe iha dulu okuenda eendjiladiledile opo va ka konge oufemba.

Kansela okwa hokolola ta ti ombelewa yaye oya ninga eenghendambala okushiviifila ombelewa youkwameni kombinga yoshikumungu eshi ashike fiyo opapa ina mona  enyamukulo kombinga nghee oshiwana shina okukala sha kwafelwa.

Okwa weda po ta ti ounona vefiyee vahapu navo iha va mono oshimaliwa shopendjela eshi ha shi pewa eefiyee shaashi vati kavena sha oufemba.

Kansela okwa ti ounona va shona navo paife iha va tambulwa vali meendodo dopetameko shaashi eefikola oha di kala tadi pula odjapo yedalo yokaana opo ka kale ka tambulwa tete. -fhamalwa@nepc.com.na


2021-11-25  Festus Hamalwa

Share on social media
Bottom of a page