Aakalimo yomomudhingoloko gwaHelao Nafidi itaya ka enda we oondjila oonde yu uka kEenhana, Ondangwa nenge kOshakati oshowo Outapi okukonga omayakulo haga gandjwa koNaTIS.

Mayola gwondoolopa yaHelao Nafidi Darius Shaalukeni okwa ti, omunambelewa omukuluntu gwelelo lyondoloopa yaHelao Nafidi okwa li a ningi omayindilo opo ondoolopa yi etelwe oombelewa dhoNaTIS, nuuministeli wiilonga niiyenditho okwa li wa zimine.

Shoka okwa li sha pitikwa konima elelo lyondoolopa nehangano lyi na sha noondjila lyedhina Road Authority (RA), ya li ya shaina etsokumweuvaneko. “Aakalimo yetu oya kala ya taalela uupyakadhi woku enda oondjila oonde okuya ngaashi kOshakati nenge kOutapi oshowo Eenhana nOndangwa opo ya ka mone omakwatho nomayakulo ngaashi gokufendela iihauto, okukonga omikanda dhokuhinga nayilwe,’’ ta ti ngaaka. Ta ti, shoka osha kala tashi kutha oshimaliwa oshindji moondjato dhaakalimo, ngaashi shi shiwike nawa kutya okumona omukanda nenge ombapila okuza koNaTIS, kasha za pokapala ka yela, omuntu oha shuna ko nando iikando ya pita pu itatu. ‘’Ngele omayakulo ge ya popepi otashi kala oshihwepo oshoka oyendji otaya ka vula oku enda, nenge okulongitha okatekisa, ta longitha oshimaliwa oshishona,’’ ta fatulula ngaaka. Shaalukeni okwa ti, oya tengeneke okupatulula omiyelo dhawo okuza momasiku 14 gaKotomba nuumvo.

Oshiwike sha zi ko NaTIS natango okwa kondo oyendji omagulu moshitopolwa shaMusati, sho a patulula oshitayi shimwe mondoolopa yaKahao. Minista gwiilonga niiyenditho John Mutorwa okwa li a patulula oshitayi shoka pambelewa. Okahao oke na aantu ye vule 30 000.  Aakalimo yomOkahao nomidhingoloko dhopopepi oya kala haya ende oondjila oonde okuya ngaashi kOshakati nenge kOutapi opo ya ka mone omakwatho nomayakulo haga gandjwa koNaTIS.

Omukanda ngoka gwa pitithwa ko-RA iiwike iyali ya piti okwa li gwa totha mo kutya natango oya tameke okugandja omayakulo komalungula. 

RA okwa li a shanga kutya shoka okwa li sha ningwa sho sha etwa komukithi goCovid-19 ngoka kwa li gwa thiminike iilonga oyindji yi longithe omalungula.

“Omayakulo agehe goNaTIS otaga monika komalungula. Shoka otashi ka kwathela oyendji kwa li taya ngundumana poombelewa dhawo,” ya fatulula ngaaka.  Ya ti, omilandu adhihe, mwa kwatelwa oofuto, otadhi vulu okuningwa kukehe omuntu ngoka e na oshihauto, te shi ningile kehe tuu mpoka e li muuyuni, ethimbo kehe, kutya nee oku li megumbo lye.  RA okwa gwedha po  kutya elalakano lyoku eta po omulandu ngoka otali kwathele wo nokuhwepopeka onkalo ya nika oshiponga yaantu mboka ya li haya humbata oshimaliwa okuya koombelewa dhoNaTIS, kaaya yugwe iimaliwa yawo kaafuthi.

– vkaapanda@nepc.com.na