New Era Newspaper

New Era Epaper
Icon Collap
...
Home / NCS a ninga omutumba noilyowilikingudu yokuyandja omayele kevyulonghalo

NCS a ninga omutumba noilyowilikingudu yokuyandja omayele kevyulonghalo

2021-09-02  Festus Hamalwa

NCS a ninga omutumba noilyowilikingudu yokuyandja omayele kevyulonghalo

Festus Hamalwa

Commissioner General Raphael Hamunyela pamwe noilyowilikingudu yokuyandja omayele kevyulonghalo laLuno mOndangwa ova ninga omutumba Etivali wali kombinga nghee ovanadolongo vena okukala va kwafelwa.

Elalakano loshiyoongalele eshi okwa li okutopolelafana omayele kombinga nghee oilyowilikingudu tai kwafele ovanadolongo, omo mwa kwatelwa omashongo a taalelwa kevyulonghalo.

Moshipopiwa Hamunyela okwa popya ta ti okwa pandula oilyowilikingudu eshi tai twikile nokulongela kumwe noshikondo shomavyulonghalo moNamibia nokukwashilipaleka kutya otava topolelafana omayele oo taa kandula po omaupyakadi kevyulonghalo.

Hamunyela okwa ti oilyowilikingudu yokuyandja omayele kevyulonghalo laLuno oya fimana shaashi otai tula po ekwatafano liwa pokati kovakwashiwana novanadolongo, nosho yo okuxwaxwameka exumokomesho kevyulonghalo.

Onghee okwa kunghulila oilyowilikingudu yokuyandja omayele opo i kale tai pwiilikine komawedelepo aa taa pewa kovakwashiwana womudingonoko ngeenge vena eshi va hala okutopolafana kombinga yevyulonghalo laLuno.Okwa ti ovanhu ova pumbwa okutopolelafana omayele nghee oupyakadi wokevyulonghalo tau kandulwa po.

“Elalakano otwa hala evyulonghalo laLuno opo li kale lina ekwatafano liwa pokati kovakwashiwana, ovanambelewa novadolongo opo va kale tava longele kumwe, nokukala tava kandula po omaupyakadi noupu, tashi pitile mokutopolelafana omayele,” Hamunyela ta ti.

Okwa kunghulila oilyowilikingudu yokuyandja omayele opo i kale tai yandje omayele koshikondo shomavyulonghalo shaashi eshi otashi kwafele omavyulunghalo opo a kale ta kandula po omapyakadi a taalelwa komavyulonghalo.

Onghee okwa ti oilyowilikingudu yokuyandja omayele nai kala tai talele po endiki levyulonghalo loshikando shimwe momwedi, opo i kale yadidilika eemhumbwe edi da taalelwa kovanadolongo.

Hamunyela okwa weda po ta ti omavyulonghalo okwa taalela omashongo ngaashi oilongifo yokulongifwa kovanadolongo ngeenge tava ningi oinyangadalwa yavo yofikola, noilongifo yokuwapaleka ei tai kwashipaleke oukoshoki noshoyo oikwafifo yombuto yoCovid-19.

“Ohandi kunghulile opo ovanhu va kale va ka tunhilwa ombuto yoCovid-19 shaashi osha fimana ngeenge omunhu a tunilwa, opo a kale eli amena,” Hamunyela ta ti.

Omunashipundi wokanguduwiliki ko ku yandja omayele Leonard Negonga okwa popya ta ti otava twikile nokukala tava longele kumwe noshikondo shomavyulonghalo moNamibia opo kukwashipalekwe kutya ovanadolongo ova kwafelwa.

Pefimbo a talela po ovanadolongo okwa popya ta ti okanguduwiliki kokuyandja omayele ota kakala ta ka talele po evyulonghalo laLuno opo ova kundafane novanadolongo kombinga yomashongo a taalelwa kevyulonghalo.

Negonga okwa u danekela ovanadolongo kutya otava ka luka opo ve u ye va ninge oshiyoongalele novanadolongo ngeenge onghalo yoCovid-19 ya shuna kouwa.

Okwa kunghulila ovanadolongo opo va twikile nokulonga noinyangadalwa yavo yofikola nelitulemo shaashi eshi otashi xwaxwameke ovanadolongo opo va kale vena ohokwe yokulongifa ounongo vavo.


2021-09-02  Festus Hamalwa

Share on social media