New Era Newspaper

New Era Epaper
Icon Collap
...
Home / NCS naWFP otava ka longela kumwe

NCS naWFP otava ka longela kumwe

2022-04-26  Festus Hamalwa

NCS naWFP otava ka longela kumwe

OSHIKONDO sheedolongo shoNamibian Correctional Service(NCS) nehangano tai longo koshi yongonga yoiwana hangano loWorld Food Programme (WFP) ova tula po eudafano lokulongela kumwe mokuyambula po oshikondo sheedolongo moNamibia. Elalakano okuyambidida oshikondo sheedolongo noikulya noshoyo okuhe ta po eepoloyeka da yooloka dounamapya.

WFP otaka yambidida oshikondo sheedolongo neepoloyeka ngaashi opoloyeka yeexuxwa tai ka kala kezulonghalo Evaritus Shikongo moTsumeb, oshikunino shounamapya tashi ka kala kozulonghalo laHardap, oshikunino tashi ka ningwa kOtavi noshoyo Hydroponic tai ka ningwa kezulonghalo laWalvis Bay. Oikunino otai ka kunwa omapungu, oilyavala noshoyo oiyiimati ya yooloka.

Edi oda popiwa kukomufala woshikondo shomazulonghalo Commissioner General Raphael Hamunyela pefimbo a ninga eenghundafana naKundana eshi a hokolola ta ti eudafano lokulongela kumwe noWFP ola fimana shaashi otali kahe ta elunduluko lakula moku heta po eepoloyeka doumanapya dihapu. Hamunyela okwa ti okwa pandula WFP eshi ta ka yambidida omazulonghalo okukandula po omashongo a talelwa komazulonghalo.

Okwa hokolola ta ti keepoloyeka tadi ka ningwa ota ku kala taku longo ovanadolongo opo va dule okukala tava longo oikulya yavo vene. “Ohatu ka pewa ovanhu ve na ounongo mounamapya okudilila koWFP opo veu ye okudeula ovanadolongo nokutopolelafana ounongo wavo kombinga nghee ve na okukala tava longo noikunomwa ya yooloka,” Hamunyela ta ti.

Hamunyela okwa weda po ta ti oikulya tai ka longwa meelopoyeka otai ka pewa ovanadolongo, eefikola dili momhumbwe yoikulya, oipangelo nosho tuu oikondo ya yooloka ya pumbwa oikulya. “Ohatu kala yoo vali hatu landifa oikunonwa neexuxwa moNamibia noshoyo kondje yoshilongo opo tu dule okukala twa mona oshimaliwa shokuyambidida oinyangadalwa imwepo ili komazulonghalo,” Hamunyela ta ti.

Omukulunhuwiliki woWFP Dr George Fedha okwa ti elalakano loukumwe pokati koNCS kali shi ashike okuyandja oikulya komazulonghalo ndele okuhambula po eepoloyeka dounamapya moNamibia.

– fhamalwa@nepc.com.na


2022-04-26  Festus Hamalwa

Share on social media