Kakukutu wopolifi yaNamibia Lieutenant General Sebastian Ndeitunga okwa ti ovanhu tava shingi vehe na omikanda dokushinga nava lopotwe kopolifi shaashi otava dulu okueta oiponga yomeendjila.
Okwa ti oshiwana nashi xulife po okukala tashi twalelwa kovanhu vehe na omikanda dokushinga shaashi eshi osha nyika oshiponga neenghono ngeenge omunhu tashingi kopate kehe na omukanda.
Ndeitunga okwa ti ombelewa yaye oya didilika oiponga imwe hai etwa kovanhu tava shingi vehe na omikanda dokushinga.
Okwa ti unene tuu ovanyasha ovo unene wa didilikwa ve hole okushinga vehe na omikanda eshi hava kala tava ye nuka opolifi kopate.
Edi Ndeitunga okwe di popya Etitatu pefimbo a ninga eenghundafana naKundana eshi a hokolola ta ti ku keshe omunhu ta ka hangika ta shingi ehe na omukanda wokushinga ota kapewa ehandukilo lopaveta.
Okwa ti unene tuu pefimbo eli lomatango manene ovanhu nava shinge noukeka nokukwashipaleka kutya otave liufa komadidiliko omeendjila aa a tulwa po.
“Unene tuu pefimbo eli lomatango manene otwa pumbwa okukala a tu shingi noukeka opo tu kelele oiponga yomeendjila shaashi efimbo eli ladidilikwa hali kanene eemwenyo dovanhu eshi hava file moiponga,” Ndeitunga ta ti.
Ndeitunga okwa ti ovanhu tava shingi va kolwa nava lopotwe kopolifi efimbo keshe opo va pewa ehandukilo lopaveta shaashi otava yandje efano lii moshiwana.
“Ovadali xulifei po okuyandja eetuwa deni kounona vehe na omikanda dokushinga shaashi kapena omunhu a pitikwa okushinga ehe na omukanda,” Ndeitunga ta ti.
Okwa ti ovanhu nava topolafane ouyelele wokukala tave liufa komadidiliko omeepata shaashi eshi otashi kelele oiponga. “Oimbuluma nai kale tai lopotwa pefimbo, ovanhu nava kale vena eenomola dopolifi efimbo keshe opo va kale tava lopotele opolifi oimbuluma,” Ndeitunga ta ti.
Okwa ti ovanhu nava longele kumwe nopolifi mokulwifa oimbuluma.