Festus Hamalwa 

Moses Ndemoongela oha landifa oihakautu neenyanga pomukunghulo wopate modoolopa mOngwediva. Ota ti kutya okulandifa osho oshipewa shaye ehole unene, yee ta yelifa kutya mongeshefa yaye omo hamu di oshimaliwa shokulikwafela nokukwafa ounona vaye.

Omulumenhu ou ota landifa oule weedula di li hetatu paife, nokuna eedula dili 34. No nande ataalela omashoongo ota ti kutya ongeshefa yaye oi na ashike oku wikila nokuya komesho.

“Inandi mona ehonge lasha tuu nande, onda xulila eike mondodo onhiheyali shaashi kakwa li pe na ou ta futile nge ofikola, onghee mofikola onda dja mo shaashi okwa li ndi li moluhepo lakula”, Ndemoongela ta ti.

Ota hokolola kutya okwa taalela omashongo ngaashi oilandifomwa yaye imwe ohai ningi nayi diva unene ngaashi oihakautu, nota ti okwa pumbwa yoo oshimaliwa opo a hambule po ongeshefa yaye i kale i li pomufika wopombada. 

“Ovanyasha vakwetu natu konge omakwafo opashimaliwa opo tu ete po eengeshefa detu shee vene, onghee itashi kwafele sha ngeenge alushe otwa teelela ashike epangelo li tu pe oilonga. Paife out li mefimbo loCovid19 onghee oinima paife oya shendja hano ya uka kowii unene tuu ngeenge tashi ya peemhito dokukonga oilonga kadi po vali ngaashi sha kala shito”, Ndemoongela ta ti.

 Okwa ti oku na ondjodi yakula opo a xumife ongeshefa yaye komesho yee a dule okupa ovanyasha vakwao oilonga nokushakeneka epangelo ondjilakati.

Kepulo ngeenge Ndemoongela oku na ehalo lokushuna mofikola ota ti, okwa hala okumona omadeulo e na sha nghee e na okukaleka po ongeshefa yaye opo i kale tai ningi oshimaliwa shihapu nawa. Xuuninwa ota ti kutya ota twikile nokukala e na omukumo nenghoono dokulonga noudiinini opo a kale ta mono oshimaliwa shaye.