Okwooko ihaku izi poshiteta tuu shili. Celeste Lukau, omukulukadhi gwapastoli Alph Lukau, okwa elekanitha omushungu ngwe naJesus, ta ti okwa alelwa komushigakano omolwa iilonga ye yokwaaludha aantu. Ta ti aanona yawo yatano oya kala nokushekwa kosikola konima yoshikumungu shi sitha ohoni shokuyumuka shoka sha li sha ningwa muFebuluali nuumvo. Uutondwe nepangulo tali zi kaantu olya li lya ehama aanona mbaka, ta ti ngaaka.
“Aanona oya li taya lili, taya pula kutya otwa ninga shike shoka sha eta omaihumbato ga tya ngaaka… he okwe ya kuutumbitha koogumwe noogumwe noku ya fatululila. Jesus okwa li a alelwa komushigakano sho a li ta ningi iinyengandunge; natse otu li moompadhi dhe.”
Ta popi kombinga yoshiningwanima shika oshikando shotango nkene tuu sha holokele, Celeste okwa ti ota yambidhidha omusamane gwe nonando pe na omapopyo kutya okuhole ondjugo nokwa ya moluhondelo naakiintu aagundjuka yomegongalo lye lyedhina Alleluia Ministries International. MuMaalitsa pastoli nguka okwa li a “yumudha Elliot Moyo kuusi. Okwa li a ti omudhimba gwaMoyo ogwa li gwa tumwa kongeleka kofamili ye konima sho aniwa a li a si omasiku ga zile ko.
Okavidio keyumudho ndika oka li ka yi omukungu nomeya komapandja gosocial media, moka oyendji ya li ya ti osha li okatoo kowala. Moyo okwa li a kana po konima yeyumuko. Omwedhi gwa za ko ofamili ye koZimbabwe oya li ya ti Moyo okwa li a sa anuwa.
“Shi na sha noshiningwanima sheyumudho, otu li moonkundathana noohahende dhetu. Osha li sha popilwa muuwinayi kaantu mboka ya li kaaya uvite ko shoka sha li tashi ningwa. 
“Itandi vulu okupopya kombinga yaashoka paife. Osha kala ethimbo edhigu kofamili nuunona kosikola sho wa kala nokushekwa kuyakwawo. Oya kala nokuya kegumbo taya lili noku tu pula kutya oshike sha li sha li po notwa kala noku ya fatululila,” ta ti ngaaka. Ina gandja oomvula dhuunona wawo.
Celeste Lukau, ngoka e na oshinakugwanithwa mongeleka okuzilila koombonge oonene dhongeleka koSandton, okwa ti uutondwe nokupangulwa kaantu oshinima shoka sha dhenga ofamili yawo pomutenya. Okwa ekelehi wo omapopyo kutya omulumentu gwe okuhole ondjugo.
“Ohandi kotha te mbonyoka uusiku. Kandi na omaipulo gasha kombinga yaashoka omusamane gwandje ta lundililwa.
“Ondi inekela omusamane gwandje. Ito mu pewa lwaali noha sile aanona yetu oshimpwiyu. Uuna iinima mbika tayi popiwa, ohandi mu itaala sho ta ti kayi shi yoshili.”
“Otu li pankatu ndjika nena omolwa omayambidhidho ngoka twa mona okuza kaantu yi ili noyi ili. Okwa ti osha li oshidhigu okufatululila aantu shi na sha neyumudho ashike ota ti omusamane gwe ke shi omukengeleledhi.
“Ke shi omupolofeti gwiifundja nandonando. Aantu ye li pokati ko17 000 no20 000 ohaye ya kongeleka yetu Osoondaha kehe. Aantu oyendji oya koleka kombinga yeyaludho ndyoka hali ningwa komusamane gwandje.
“Eeno, eyumudho olya ningwa naantu oya popya kombinga yalyo, taye tu ula omadhina. Ashike omulumentu gwandje ina kukuma nando. Okwa kala ta galikana noonkondo”
Celeste Lukau okwa valelwa moNamibia nokwa li e ya koSouth Africa mepipi lyomimvo oonshona. Yo naLukau oya li ya monathana pongeleka yimwe mo2000, noya li ya hokanathana konima yoomvula mbali.
“Ongeleka otwe yi kokitha yi thike mpoka yi thike ngashingeyi. Otwa kala nokugalikanena aantu, naantu otwe ya kwathela nomolwaashoka osho u wete tu na aalanduli ye thike pomwaalu ngoka.
Okwa ti ongeleka oyi na iitayi 13 moGauteng osho wo pomahala galwe moshilongo, osho wo iilyo koUK naFrance.