New Era Newspaper

New Era Epaper
Icon Collap
...
Home / Nghipangelwa: Etunhilo loCovid-19 tali ende tali shongola mOshikoto

Nghipangelwa: Etunhilo loCovid-19 tali ende tali shongola mOshikoto

2022-02-10  Festus Hamalwa

Nghipangelwa: Etunhilo loCovid-19 tali ende tali shongola mOshikoto

Omukulunhuwiliki wouhaku moshitukulwa shaShikoto Joshua Nghipangelwa okwa ti ovanhu otava ende nakashona oku ka tunhilwa ovenda yoCovid-19 eshi komandiki ouhaku ihaku holoka vali ovanhu ve li momwaalu muhapu ve uya ketunhilo.

Nghipangelwa okwa ti ovanhu ashike 13 779 va tunhilwa ombuto yoCovid-19 va mana ko eevenda davo, omanga ovanhu 22 293 ova tunhilwa ovenda yotete novanhu 700 va tunhilwa ovenda onhinatu moshitukulwa shaShikoto.

Okwa ti eshi osha eta opo moshitukulwa mu kale mu na omwaalu u li pombada wovanhu 7 570 va kwatwa kombuto yoCovid-19 shaashi ovanhu vahapu inava tunhilwa, omanga ovanhu va fya kombuto yoCovid-19 neudo ove li 260.

Nghipangelwa okwa ti moshitukulwa omwa lopotwa mu na omunhu umwe e li koICU kOmuthiya novanhu vanhe ve li moshipangelo, novanhu  vakwao ve li komaumbo ve na ombuto ashike aveshe inava tunhilwa.

Okwa ti oshipangelo shaNandjokwe osho shimwe sha didilikwa shi na omivalu dihapu dovanhu va kwatwa kombuto eshi ovanhu 3 395 va kwatwa kombuto taku landula oshipangelo shaTsumeb shi na ovanhu 2 258 va kwatwa kombuto.

Okwa kunghulila oshiwana opo shi ka tunhilwe shaashi osha fimana ngeenge omunhu a tunhilwa nokukala yoo vali she liamena kombuto.

“Etandavelo lombuto otali shuna pedu ngeenge ovanhu tava ka tunhilwa ile tave liufa komilandu edi da tulwa po okukelela ombuto,” Nghipangelwa ta ti.

Okwa ti ovanhu nava twikile okutopolelafana ouyelele kombinga nghee sha fimana ngeenge omunhu a tunhilwa opo ovanhu va kale ve na eudeko nokukala yoo vali va xwaxwamekwa oku ka tunhilwa.

“Oveene vomikunda nomalelo omifyuululwakalo nava yambidide oshikondo shouhaku okukala tava ningi oikonga yokuyandja ouyelele kombinga yetunhilo loCovid-19 shaashi omukifi ou owa nyika oshiponga,” Nghipangelwa ta ti.

Okwa hokolola ta ti ovanhu vahapu va kwatwa kombuto otava ende tava veluka eshi ovanhu 7 286 va lopotwa va veluka paife novanhu 21 ovo ashike ve na oCovid-19.

Omukulunhuwiliki okwa weda po ta ti Oshikoto osha faneka okukala sha tunhila ovanhu 12 6185 moshitukulwa ashishe neudo opo ku kwashipalekwa kutya oshiwana shihapu osha tunhilwa.

fhamalwa@nepc.com.na


2022-02-10  Festus Hamalwa

Share on social media