Victoria Kaapanda

ONGWEDIVA - Omupopiliko nomugandjimulombo gwopolisi moshitopolwa shaHangwena Abner Kuume Itumba okwa ti kehe ngoka ke na omukanda gokuhinga ohauto, ina hinga oshoka osha nika oshiponga.
Iitumba ndhoka okwe dhi popi konima yiiponga mbyoka ya holoka mehuliloshiwike lya zi ko, ta ti iiponga oya ninga oyindji nuunene ohayi etwa kaahingi yaa na omikanda dhokuhinga.

Itumba ta gandja iiholelwa moka uunona uyali wa hulitha sho wa lyatwa kiihauto mbyoka yali ta i hingwa koondalaiva kaadhi na oomikanda dhepitikilo lyokuhinga.

Moshiningwanima shotango omoka okanona kokamati komimvo hetatu oka pumwa kohauto sho ka li taka taaguluka opate poshipangelo shaKongo, moshitopolwa shaHangwena omasiku sho gali 21 Juli potundi 07h00 yongula. “Omulumentu ngoka, okwa li a tsikile okuhinga nelalakano lyokufadhuka po, ashike okwa li a landulwa sigo a kwatwa, noku li miikaha yopolisi.” Iitumba osho a ti ngaaka. Okanonamati hoka oka li ka tongololwa onga Katana Alfius, a yambukile momukunda Oluhapa. Alfius okwa li a falwa a ka mone uuhaku  koshipangelo oshinene shaNandjokwe.

Moshiningwanima sha faathana moshikandjohogololo Eenhana, okanonakadhona komimvo heyali kedhina Tunelao Immanuel oka li ka lyatwa kohauto, sho ka li taka taaguluka opate pamwe naanasikola yakwawo. Immanuel okwa li a mono ekwatho lyopetameko moshipangelo shEehnana nokonima okwa li a falwa koshipangelo oshinene shaShakati.