New Era Newspaper

New Era Epaper
Icon Collap
...
Home / Ngungula nomoAngola ota elele ovanhu ....Ovanamibia va ninga oihakanwa yomunyeka womaliko moAngola

Ngungula nomoAngola ota elele ovanhu ....Ovanamibia va ninga oihakanwa yomunyeka womaliko moAngola

2022-08-18  Festus Hamalwa

Ngungula nomoAngola ota elele ovanhu ....Ovanamibia va ninga oihakanwa yomunyeka womaliko moAngola

Ovanamibia va ti ova ninga oihakanwa yokudengwa noshoyo okunyekwa omaliko avo ngeenge ve li moAngola vaka landa oinima yavo ile vaka nwefa omahooli.

Otaku hokololwa ovanamatuwa Ovanamibia ovo hava i meni laAngola hava ponokelwa kovakwashiwana vaAngola ovo vati hava kala ve li meengudu ve kwe te eembele noshoyo omakatana

Ova hokolola tava ti ngeenge va nyekwa omaliko avo kave na kutya ohava ka lopota shaashi ove na oumbada na inave li neekela opolifi moAngola.

Ova hokolola tava ti paife ina va manguluka vali ngeenge tava i moAngola shaashi ohava kala alushe va tila okudengwa, okunyekwa omaliko avo noshoyo eetuwa davo di dengwe nomamanya.

“Ngungula shaashi nee ina pitikwa vali moNamibia, ohatu taulika eengaba ngeno tuka nwefe pomahooli opo Santa Clara, ashike oto hange ovalumenhu va homata tave ku keelele shaashi inava hala uka nwefe komaholi ova hala ngeno unwefe pungungula moAngola. Oundjuu nee wokunwefa pungungula moAngola oto vakwa oinima yoye. Ngaashi ame onda vakwa ongodi yange yopeke nokatuviko kokotenga yange yomahooli. Efiku olo onda dja ko koAngola notenga yotuwa inai tuvikwa,” umwe ta hokolola.  Omwedi wa dja ko opolifi mOhangwena ya lopota kombinga yOvaangola vati ngeenge tava lombwelwa kopolifi yaNamibia va xulife po okulandifa omahooli oo ina ma ufwa ohava kala va hala okulwifa opolifi.

Onghee naashi osha eta opo Ovaangola va kale va hala okudenga ovaNamibia ovo hava ka mwefa nokulanda omahooli moAngola eshi tava nyenyeta kutya ka shili payuuki.

Opolifi okwa li ya lopota kombinga yovaNamibia novanambelewa vopolifi va ninga oihakanwa yokudengwa kovakwashiwana vaAngola eshi vati hava kala tava ponokelwa ngeenge ve li moAngola.

Ovaangola hava landifa omahooli kOshikango ohava kala ve na eembele nomakatana va hala okudenga ovapolifi vaNamibia ngeenge ve li moilonga.

Eetuwa mbali dovaNamibia okwa li da lopotwa dadengwa domamanya kOvaangola eshi kwa li ovaNamibia vaka mwefa omahooli moAngola. Umwe womukwashiwana ha shingi otuwa yolefa okwa lombwela Kundana ta ti Ovaangola ova kwata onghone konima eshi opolifi hai vatataa ngeenge tava landifa omahooli paumbudi kOshikango onghee paife ove li unganeka opo va kale tava denge nokunyeka ko omaliko ovaNamibia ovo ta ka hangika tava mwefa omahooli moshingo shavo.

“Omahooli okwa ninga ondilo paife. Fye ihatu longo oshimaliwa shihapu mopate onghee naashi osho hashi eta opo tuye tu kamwefe ile tu ka lande omahooli moAngola opo tu dule okuxupifa po okamaliwa ko ku li kwafela,” ta ti.

Omukainhu umwe naye ha ka tala omalodu ooWhiskey okwa hokolola ta ti ka shi li payuuki eshi paife Ovaangola ve li yanena mOshikango tava landifa omalodu Whiskey nomahooli omanga vo va xulifa po okulandifa shaashi hava nyekwa oinima yavo.

“Nafya ohatu kongo ashike ouxupilo ngaashi Ovaangola. Fyee mokulandifa omalodu omo hatu xupu onghee paife ngeenge otwa xulifa po okulandifa ouWhiskey ohatu mono oixuna kondjala noluhepo,” ta hokolola. Ova weda tava ti noNamibia ava hava pitile koshivelo sheengamba navo ova ninga oihakanwa yokunyekwa omaliko ngaashi eengodi dopeke.

Onghee tava indile epangelo laAngola opo li popye novakwashiwana vavo vaha nyeke ko vali omaliko avo shaashi eshi otashi kala shi ete oita pokati koilongo ei ivali.

Eshi a kwatafana naKundana omupopiliko wopolifi moshitukulwa shaHangwena Sergeant Andreas Nghiyolwa okwa ti opolifi yaNamibia oya taalela eshongo linene mokukonakona ovakwashiwana vaAngola keengamba.

Nghiyolwa okwa ti ovakwashiwana vaNamibia vamwe ohava i moAngola tava longifa oumbudi okuka tala oinima oyo ina i pitikilwa moNamiba.

“Ovanhu ka hole okukalopota kopolifi ngeenge va nyekwa omaliko avo shaashi ohava kala navo va longifa omukalo woumbudi. Onghee opolifi kai na kutya otai ningi po shike ngeenge omunhu a kufwa omaliko aye pefimbo kwa li ta longifa omukalo woumbudi,” Nghiyolwa ta ti.

Okwa yelifa ta ti Ovaangola ova kwatwa onghone eshi hava kala tava tewatewa kopolifi yaNamibia hava la ndife vali omahooli kOshikango.

Okwa weda po ta ti Ovamibia onghee ngaa natango tava kwatwa nomandini omahooli momaumbo avo eshi hava ka tala moAngola va landife.

Okwa kunghilila ovaNamibia opo va xulife po okukala tava i moAngola shi e li payuuki shaashi eshi otashi kala shi ete oshiponga ngeenge omunhu okwa ponokelwa kOvaangola noshoyo okukelela va nyekwe vali omaliko avo.

Kundana okwa kendabala okukwatafana nombelewa yomukalileposhilongo waAngola mOshakati ashike ongodi yaye itai nyamukulwa. - fhamalwa@nepc.com.na


2022-08-18  Festus Hamalwa

Share on social media