Epangelo lyaNamibia olya hala kehe Omunamibia a kale ena egumbo lye mwene, oshowo a kale eli monkalo tayi hokitha.
Ndhoka okwali dha popiwa kUminista gwomayambulepo gOondolopa nIitoplwa yokUushayi
Erastus Uutoni.
Uutoni okwali ta popi ngaaka esiku a patulula omagumbo 81 kOutapi mehuulilo shiwike.
“Otwa ndhindhilike kutya oyendji otaya nyengwa okugwanitha oshimaliwa shokulanda omagumbo, unene mboka yena iiyemo yopokati okuuka pevi,” ta ti ngaaka
Ta gwedhapo kutya NHE okuli metifa okutungila oshigwana omagumbo 70 kOkahao oshowo 33 kOtsandi.
Omunashipundi gwehangano ndyoka NHE Sem Shivute okwati oyali ya pondola okutunga omagumbo ngoka mekwatelokomeho nehangano Tona holding trading. “Omagumbo ngoka okwali ga gandja iilonga kaakwashigwana ye vule 350, no yendji yaza momudhingoloko gOutapi,” ta ti ngaaka. Ta gwedhapo ta ti, omagumbo agehe ngoka okwali ga koho ongushu yoomilliona N$9. Petameko lyomwendhi nguka natango NHE okwali agandja omagumbo mOtjiwarongo.
Omukuluntu gwehangano NHE Gisbertus Mukulu okwa ti oya longitha oomilliona N$11,5, nepangelo okwali lya yambindhindha noomilliona N$5, ndhoka kwali dha longithwa moproyeka mOtjiwarongo.
“NHE okuna ohokwe yoku yambindhindha oshigwana opo shi kale tashi zi momahala gena oyuugoki okuyanda uupyakandhi tau vulu okutula oshigwana muupyakandhi uuna itaya zi momagumbo geli nawa,” ta ti ngaaka. Ta gwedhako kutya oyendji ohaya mono omagumbo taga tungwa komahangano gopaumwene nuundhigu.
“NHE okulilepo oshigwana opo shi mone omagumbo kondando tayi vuluka koyendji,” ta ti ngaaka.
Ehangano lyokutunga omagumbo omwendhiegwayi okwa li lya pula oshigwana shi ninge omaindilo gokulanda omagumbo moondoolopa dhili ne moshilongo.
NHE ota landitha omagumbo ge li 241 moondoolopa Otjiwarongo, Outapi, Omuthiya oshowo Okahao.
Ngoka gomaangoka 40 gali ga gandjwa mehuulilo shiwike kOtjiwarongo. Omunambelewa pitithi Taufi Shafombabi, okwati omagumbo ngoka oga tungwa pashinanena.
“Kehe ngoka a hala nenge e li mompumbwe yegumbo, okwa manguluka okuninga eindilo muyimwe yomoondoolopa ndhoka dhi Ii ne,” ta fatulula ngaaka. Ta ti omagumbo ngoka oga tungwa ge li pamaludhi goondunda mbali nenge ndatu dhokulala, sha ikwatelela kuunene wegumbo ndyoka omulandi a hala. “Omagumbo oge na oondando okuza N$394 365 sigo N$500 000, sha ikolelela kongushu yegumbo ndyoka omulandi a hala,’’ ta fatulula ngaaka.
Ta ti ehangano otali landitha omagumbo ngoka, onga oshinakugwaitha shehangano lyo-NHE okugandja omagumbo moshigwana.
Shafombambi okwa ti, ngele gumwe a hala okuniga omayindilo na faalele okambapila kiiyemo ye yokomwendhi, komwendhi wa hugunina, ombapila yomayalulo gombaanga yoomwendhi ne oshowo onzapo tayi ulike kutya oho futu otakisa.
‘’Kehe ngoka a hala okuniga omayindilo na thike poombelewa dhetu oonene pOshakati oshowo Katutura nenge ya dhenge koonomola on 065 229 150, 061 276 100,” ta ti ngaaka. Oshigwanaa osha taalela oompumbwe dhomalukalwa, onkene NHE okwa longekidha omagumbo ngoka okukandula po uupyakandhi wa yamwe nonando haayehe poshikando shimwe.
Ya ti, otaya tsikile okutungila oshigwana omagumbo, notaya kala taya tseyithile oshigwana aluhe shi ninge omayindilo.
– vkaapanda@nepc.com.na