Lazarus Hakwaake
EENHANA – Ombelewa yokuyandja olusheno moshitopolwa shokonooli (NORED) nombelewa yepangelo lopashitopolwa oshoyo omalelelo eedoolopa mOhangwena ova twa kumwe pakushaina omukanda wokuyandaja omayakulo a denga mbada mOshitukulwa ashishe shOhangwena.
Oshitukulwa shOhangwena osho shi li poutivali mouhapu wovanhu moshilongo sha shikula oshitopolwa shaKhomas pamavalulo oshiwana odula 2011, shi na ovanhu ve fike 245 446 pakuyeleka noKhomas i na ovanu ve fike 342 141, eshi otashi ulike kutya ovanhu ve fike petata lomiliyuna ove limiitopolwa eyi ivali.
Eudafano eli lokuyandja omayakulo pefimbo nokwadenga mbada ola tulilwe po lotete konima yeedula nhatu paife, kwa li la shainwa koitukulwa aishe hai tukulilwa eenghono dolusheno kuNORED. Nomefiku 01 November 2018, NORED oshoyo ombelewa yelelo loshitukulwa shOhangwena ova shainununa omukandadiminino oo wa talululwa notau kwashilipaleke kutya eembelewa edi mbali otadi ka longela kumwe opo di dule okukala da yandja omayakula opefimbo a denga mbada notaa hafifa oshiwana. Omukanda ou owa popya sha yela kutya NORED oye aeke ehangano la pewa ombapila yokuyandja olusheno, okutula po omashina oshoyo oilongifwamo yolusheno moshitopolwa shOhangwena. Eudafano eli itali ti kutya NORED nOhangwena Regional Council ova ya mumwe va ninge Ombelewa imwe, ashike otava ka longela kumwe opo va shakeneke eemhumbwe doshiwana pamuhanga.
Imwepo yomoinakuwanifa ya kwatelwa meudafano oyo ei kutya, NORED oku na okukala ta pashukile elongifo leenghono dolusheno, nokutala kutya olusheno otali longifwa pandjele ngaashi sha tulwa po kehangano olo hali pashukile elongifo leenghono dolusheno opo li ha longifwe sha pitilila, NORED oku na yoo okutula po omutengenekwafaneko woimaliwa keshe odula opo ku dule ku tulwe olusheno peenhele odo tadi kulu tadi endelele. Ombelewa yoRegional Council oya pumbwa okushivifila nokuyandja kuNORED omafaneko aeshe omaxumifo komesho oo a fanekwa kovafaneki nokwa dimininwa opo a tulwe olusheno. Ohangwena Regional Council oya teelelwa yo okukala ya shivifila NORED oitufi yoshiwana ya fanekwa manga ku na omafiku atano komesho opo NORED a kwashilipaleke kutya kape na odima yolusheno fiku olo.
Oshitufi eshi osha kalwa kookamushela voshitopolwa, veedolopa oshoyo ovawiliki veedolopa ngaashi Eenhana, Helao Nafidi oshoyo odoolopamukunda yaKongo.
Konima eshi eudafano eli la fatululwa nola tambulwa, Omunashipundi wOhangwena Regional Council, Omufimanekwa Erickson Ndawanifa, Omunambelewa Omukulunhu wOhangwena Regional Council, Tate Fillipus Hasenanye Shilongo oshoyo Omunambelewa Omukulunhu woNORED Tate Fillemon Nakashole ova shaina edudafanotwokumwe leedula nhatu fiyo omo2021 eshi tali ka talululwa natango.
Omunashipundi wOhangwena Regional Council, Tate Erickson Ndawanifa okwa pandula unene omolwa eudafano eli, okwa ulika kutya olusheno otali dana onghandangala inene momaxumifo komesho oshitopolwa, onghee onghatu ei oyo onghatu yokuya komesho momaxumifo komesho oshiwana. Okwa indila eembelewa edi di longele kumwe opo di yakule oshiwana nawa.