Agnes Petrus
OUTAPI –Epangelo laChina ola tungila ofikola yaJohn A. Pandeni Combined School oundjuwo vongushu yeN$150 000.
Oundjuwo ovo ve li vahamano ova li va pewa pambelewa hamushangandjai woSwapo, Sophia Shaningwa kuZhang Yiming.
Gavena woshitukulwa shaMusati Erginus Endjala okwa pandula unene epangelo laChina molwaasho la yandja nokuhelikwata ketungo loundjuwo, okuwapeka omatungo a kulupa nokutula oipundi noitaafula momatungo omo.
“Eyambidido ole ya pefimbo liwa opo twa pumbwa okuyakulwa komutengi woshimaliwa needjo dikwao da pumba. Omolwaasho nandi pandule ofikola eshi ya longa noudiinini opo i konge omakwafo ngaashi naanaa sha li sha pulwa kuminista welongo,” Omukulunhu welongo ta kwafele mOshitukulwa shaMusati Sophia Ashipala ta ti.
Ashipala ta ti omhumbwe yomatungo oyo imwe yomeeemhumbwe dakula da taalela oshitukulwa nonghee okwa pandula ovakwashiwana vaChina molwaashi va tondoka onghuwo mokukwafela nokutula elimemesho koshipala shokaana okaNamibia.
Yang Jun oo a li ta popi ponhele yaAmbassada waChina moNamibia okwa ti, pamaliudo aye mwene, oJohn Alfons Pandeni Combined School otai kala edidiliko loukaume pokati kavo noshiwana. Ta ti odula ya dja ko ovanafikola vamwe pofikola opo tuu opo ova li va ninga ovanelao eshi va futilwa ofikola kombelelwa youkaleliposhilongo waChina. Oshimaliwa shi fike poN$40 000 oshali sha vatela ovanafikola veli 20.
Eefikola moNamibia oda taalelwa komashongo oikwafifohongo inai li xwa po, omhumwe yomatungo noyovahongi va deukika. Ounona vamwe ohava ende eevile nhatu fiyo nhee op ova fike keefikola, manga vamwe ohava longelwa koshi yomiti. Eshi osha etifa opo ambasada waChina moNamibia e uye po noshikefa shokukwafela ounona vofikola moitukulwa aishe 14 moshilongo.
John Pandeni Combined School ofikola younona okudja pondodo 6 fiyo 10. Kumwe oi na ounona 560 novahongi 24.
Pefimbo loshivilo, kaume kofikola oyo Simon Andjamba okwa udaneka okuyandja oshimaliwa shi fike poN$ 50 000, omanga oembasi yaChina ya udaneka vali okuyandja oN$10 000. Hon. Sophia Shaningwa pauye mwene okwa udaneka oN$ 5000, omanga Gavena wOmusati Erginus Endjala a udaneka oN$ 3000.00. Isdor Kanyangela, naKansela Werner Kalipi waAnamulenge, nehangano laTona Trading Cc keshe umwe okwa udaneka okuyandja omaano oshimaliwa shi fike poN$ 2000.
¦ Agnes Petrus Omunambelewa omulihongi wokuandjaneka ouyelele kOuministeli Womauyelele nOmakwatafano Opaungoba, Omusati Regional Office