WINDHOEK-Omukuluntupithi gwelelo lyondoolopa yOutapi Ananias Nashilongo ota londodha aalandithi yomomapandaanda unene mondoolopa ndjoka  opo ya iyuthe komalombwelo gelelo ndyoka  ya yande iiponga mbyo inayi tegelelwa.
Shika Nashilongo okwe shi popi sho pwa holoka oshiponga shokanona hoka ka si sho ka gwile mombiga yomagadhi guukuki omanga yina ta landitha uukuki mboka a li ta teleke.

Nashilongo okwa hokolola kutya aalandithi mbaka oya kala noku indikwa okulanditha nuunona moodhikwa ihe oya kala nokupataneka elelo ngashingeyi shoka osho sha ningwa po.

“Andi dhimbulukwa kutya aantu oyo tuu mboka oya li ye ya kune aakundaneki opo mu shange elelolyondoolopa yetu , ngashingeyi tala nduno shoka sha holoka po. Sho elelo lya ngambeka uunona mboka uushona waa landithwe nawo oshoka olya tala kutya oshi li sha nika oshiponga unene kuunona mboka uushona,” Nashilongo ta popi ngaaka.
Okwa ti shika osha ningilwa popepi nolukanda lwOnhimbu mondoolopa oyo tuu ndjoka. Omumvo gwa zi ko mbaka oya li ya lundile elelo ndyoka kutya  inali hala ya konge oomboloto dhoyana oshoka yo oye na nale iimaliwa onkene otali ya thindile kegumbo opo ya kale mpanga taya putudha uunona.

Ashike Nashilongo okwa ti kutya elelo itali ka shuna monima kompango ndjoka oshoka inali hala iiponga yoludhi ndoka yi indjipale mondoolopa oshoka otayi nyatekitha edhina lyondoolopa.

Sho Kundana a popi nomupevi Commisioner ngoka e li omukwatakanithi gomakonaakono niimbuluma Commisioner Moses Simaho okwa koleke oshiningwanima shoka ta ti kutya  osha holoka mOsoondaha mondoolopa ndjoka.
Simaho okwa popi kutya  Dawid Enkali Hifile ngoka e na omumvo gumwe noomweedhi omulongo 11 okwa li ta dhana omanga yina ta teleke uukuki ihe  okwa gwile ashike mombiga ndjoka yi na omagadhi omapyu ngoka ga fuluka  pomatala gedhina Olefa.

 Okwa hokololwa ishewe kutya nakuvala omunona ngoka okwa li a thiga omunona momake gamukwawo e mu tonatele omanga ye  a ka landa sha mbala momatala, ihe sho a galuka okwa a dha nale omona a pya. “Nakusa okwa li a falwa mbala koshipangelo shOutapi pethimbo opo tuu mpoka ihe  okwa sile poshipangelo kiilalo mbyoka a li a pi,” osho Simaho  a hokolola ngaaka. Okwa li woo a popi kutya kutya oshiningwanima shika kasha li sha lopotwa kopolisi ashike opolisi oya li ya nothelwako et aya ningi omakonaakono gwomeendelelo. “Omalongekidho gefumviko lyanakusa olya li lya ningwa nale nokuli ihe opolisi oya li ya kaleke omalongekidho gaye komeho opo omudhimba nguka gu ka tandwe . onkene omudhimba nguka ogwa li gwa falwa kokila yopolisi koKahao opo gu vule oku ka tandwa,” osho Simaho ati ngaaka.