Lasarus Hakwaake

OKONGO – Ovakwashiwana vokoitukulwa yokeengaba ova kala nokukwena kutya ihava mono omayakulo e lixwa po okudja oshilongo nghee sha mangulukile. Omafimbo kemale eshi ovakwashiwana va kala noku likala kutya kave shi vokoshitulwa shonhumba ile shongadi shaashi vati hako hava mono omayakulo.

Omolwa onghalo yomayakulo aa a nghundipala unene kovanhu  ve li keengaba doitukulwa, oshitukulwa Ohangwena, Kavango Uninginino oshoyo Oshikoto ova tula po eudafanotwokumwe opo va dule okunawapeka omayakulo oshiwana olo la shainwa mOkongo moshitukulwa shaHangwena notali ka talululwa konima yomido nhano.

Eudafanotwokumwe eli ola shainwa kovanashipundi nokovanambelewa ovakulunhu voitukulwa oyo itatu. Eudafano eli otali ka kwashilipaleka kutya otapa ka kala omalongelokumwe, enghonopaleko, nokuninga omafaneko pamwe moinima yomaxupilo oshoyo oinyangadalwa yomaxumifokomesho palongelokumwe loitukulwa ei itatu. Okwa tofwa mo unene elongelokumwe moinima ngaashi, omhumbwe yomeva, oundjolowele, omakwatafano eendjila, eefikola, omaumbo, omauyelele nomakwatafano opaungoba oshoyo okutopolelafana eedjo dopaushitwe. Omunambelewa omukulunhu mOhangwena Regional Council Fillipus Shilongo okwa lombwela ookatale konawa kutya eudafano eli ola eta po omukangha welongelokumwe mokukwafafana, okupingakenifa omayakulo, mokuninga omapekaapeko moinima ei yapambafana moitukulwa ei, nokutofa mo oshoyo okutula moilonga eeprojeka odo tadi ka eta po omaxumifokomesho taa kalele kwa talwa unene ovanhu ve li keengaba doitukulwa ovo va kala va liwa oshipungo unene.

Omunashipundi woHangwena Regional Council, Erickson Ndawanifa, okwa popya kutya okushaina eudafano eli otaku holola nghee epangelo li na ondjungu yokuyandja omayakulo a denga mbada moinima yexumifokomesho nokuyandja omayakulo pefimbo koshiwana. Omunashipundi woKavango West Regional Council, Josef Sivaku okwa indila opo ovanambelewa ovakulunhu vomoitukulwa itatu va kale nodjungu nokutala kutya oishonekwa aishe i li meudafano eli oya wanifwa opo ashike onakwiiwa yoshiwana i kale ya xumifwa komesho. Omunashipundi wOshikoto Regional Council, Samuel Shivute, okwa ti eudafano eli otali ka kufa po endubilo lomayakulo ponhele imwe aike keengaba doitukulwa ei itatu, okwa popya kutya eudafano eli ola patulula omivelo dokukwafelafana ngaashi sha kala hashi ningwa nale kutya “mushiinda shomunangobe iha ningi omwiinga” onghee ei oyo omhito yokutungafana onga oitukulwa ina onghalo yafaafana pakuyambididafana paedjo dopaushitwe oshoyo eedjo dopanhu.

Ngoloneya waHangwena Usko Nghaamwa naye okwa mona omhito, nokwa tambula ko eudafano eli nokwa pula ovakufimbinga va tale koilalakanenwa, oshoyo koishonekwa yeudafano eli, va longe noudiinini opo va shakeneke ashishe, mokukwafela okuyambulapo onghalo yovanhu oshoyo okukaleka po eedjo dopaushitwe.