ONGWEDIVA - Ngoloneya gwoshitopolwa shaHangwena Walde Ndevashiya okwa ti ombelewa ye otayi tsikile noshinakugwanithwa shokuyambidhadha nokuyambula po onkalo yaakalimo moshitopolwa okupitila moopoloyeka noopologalama dha yooloka.
Ngoloneya shika okwe shi popi pethimbo a li ta gandja oshipopiwa she shokomumvo moka a ndjandjukununa ashihe kombinga yonkalo ndjoka ya kwatela mo ehumokomeho lyoshitopolwa.

Ndevashiya okwa totha mo unene uunamapya nuuniimuna onga ogo esipa lyombunda lyoshitukulwa she, ta ti ombelewa ye oya itula mo okuyambidhidha oshikondo shika. 
“Uunamapya owo esipa lyombunda moshitopolwa shika, onkene epangelo olya longitha oompito adhihe okuyambidha opoloyeka ndhoka dhi gandje iizemo iiwanawa opo dhi gandje wo natango oompito dhiilonga kaakalimo,” Ndevashiya ta popi ngaaka.
Epangelo okw ali lya kwathele opoloyeka yokukuna iimeno ya yooloka, mbyoka kwali ya gandja ompito yiilonga kaantu ye thike 175. 
Ndevashiya okwa ti, oshitopolwa shika osha dhidhilikwa osho oshitiyali shi na aantu oyendji miitopolwa ayihe yaNamibia, shina aantu yeli 255 510. 

Osha yambekwa natango nuushitwe ngaashi evi ewanana nokukuna iikwamboga, omeya  gokohi yevi oshowo ombuga.
“Nonande Ohangwena oya taalela omashongo ga yooloka mwa kwatelwa omikithi odhindji oshowo ngoka tagu dhana onkandangala Covid-19, oshitopolwa shika oshi na okulonga nokuhumakomeho kaape na okusholola,” Ndevashijya ta ti ngaaka.
Ta ti, ondjala ndjoka ya li ko omumvo gwa yi, aanafalama okwa li ya thiminikwa konkalo okulanditha iimuna yawo  momukalo gwaangoka ena oshimaliwa oshindji oye tayi nayo.

Aanafalama ye li 33 oya li ya gongele oshimailwa shi thike N$1 592 100, niimuna yi li 232.
Ombelewa yaNgoloneya oya li ya yambidhidha aanafalama ye li 36, niikombo yi li 180 oshowo omiti dhoku yi keelela komikithi, mboka kwa li ya dhewulilwa uunafalama  mo2018/2019.

“Ondi shi okutumbula natango kutya, aanyasha ayehe mboka ya li ya ishangitha miikandjihogololo ayihe ye na ompumbwe yiilonga oy ali ya kutwa kiilonga yopokathimbo ya kala tayi longwa moshitopolwa, koomilliona N$4 291 090,” Ndevashiya a popi ngaaka.
A gwedhapo ta ti, oku shi okutumbula aayelele mboka ya kala haya thigwa po kelongo, ta ti oyendji oya li ya mono ompito yokuya kosikola. Ta popi ta ti natango yamwe oya li ya mono ompito yokulonga momahogololo ga ziko.
Ndevashiya ta ti, oshitopolwa shaHangwena osha huma komeho ngaashi mokutunga oopate oshowo oku andjaneka omalusheno miitopolwa ayihe ya kala kaayinasha.

“Nonande omeya gokopomba ga kala uupyakadhi ethimbo ele moshitopolwa shetu, okwa li twa mono oondungu dhomeya miitopolwa Omundaungilo oshowo Oshikunde koomilliona N$6 074 820,” Ndevashiya a popi ngaaka.
Okwa popi ta ti, oonakulwa aakulu yeli 265 moshitopolwa moka nayo oyali ya mono omakutu gawo.
Ta  ti, oosikola dho petameko oshowo onene, dhimwe odhili metifa okutungwa  omanga dhimwe dhina omihandjo dhapwa okutungwa.
Ta gwedhapo ta ti, uupangelo uushona oshowo omahala go kuza, oga tegelelwa okupwa omvo taguya kiimaliwa oomilliona N$17 671 368.