New Era Newspaper

New Era Epaper
Icon Collap
...
Home / Ohanona yomivo ndatu otayi lele aakulupe

Ohanona yomivo ndatu otayi lele aakulupe

2019-08-16  Staff Reporter

Ohanona yomivo ndatu otayi lele aakulupe

Victoria Kaapanda 

ETAYI –Omukulupe gwomutoko e na omimvo 97, nagumwe a lemana gwomimbo 65 otaya silwa oshimpwiyu kokatekulu kokadhona ke na owala omimvo ndatu (3).

Mbaka oye li momukunda Onghuwo mOshikandjohogololo shaEtayi mOmusati.
Okanona hano kedhina Shiwoshili Kamati ohaka sile oshimpwiyu aakulupe mboka, Ndilipo Mbinga (97) no mumwanamati gosheeli Shaalukeni Shilungileni (65), oku ka teka omeya komuthima ko oko haka longo iilonga ayihe yo megumbo.

Megumbo moka anuwa omuna omulumentu gwomimvo 23 ngoka heya po owala, oku yeka ko iimaliwa yaMbinga, ngele a kwata openzela, iha kwathele sha megumbo.

Shilungileni ngoka hi ipwedha owala okwa lombele Kundana ta ti, okwali owala a valwa nokuputuka e li nawa, ashike esiku limwe muJanuali nuumvo okwali aka tyaya iikuni momuthitu e ta ishata po, naashi a zi mpoka okwali a luluma moombati nomontulo.

Ta hokolola ta ti sho a penduka ongula yesiku lya landula ko andola a tsikile niilonga ye yomegumbo ngaashi shito, ina vula oku thikama sigo onena. Okwali a ithana yina opo eye e mu thule ihe ina shi kwathela sha. Shika osha ningwa omweedhi heyali dha pita po. 

“Sigo opaife ondi uvite ashike montulo ta mu ehema, onkalo oya dhigupalela ndje oshoka ihandi vulu oku longa sha, oshoka ihandi ende, kandi na nkene ndi kwathele meme. Ngaashi mu mu wete kutya okwa kulupa no ke na sho ta vulu okulonga we,” Shilungileni ta ti ngaaka.

Ta gwedha po ta ti okatekulu ke, ka valwa komumwayina kadhona ngoka a hula ko nale, ohake ya po ashike ngele omukulupe a kwata openzela nelalakano lyo kuyaka po iimaliwa yopenzela yomukulupe oshoka omukulupe imaliwa keyi shi. Kamatyona ngoka oye ashike hatu mwa oku ka landa iikulya ashike oshendja iheyi galula.

“Kandi na kutya ote ningi ngiini oshoka oye ashike ndi na oku tuma kondolopa, ihe ihaku galuka oshendja, ohati ashike okwe yi lefa po. Shampa a landa mo ekutu lyuusila noka pakete koohi nomagadhi aniwa ka pu nasha we oshendja oshoka imaliwa kandi yi shi.

“Omumati gwandje nguka gwo sheeli oye ngeno a li e na oku kwatha ndje ihe iha vulu we oku enda oha kokaya ashike. Sho tandi ke mwiithana ndi mu lombwele kutya onda kuthwa oshimaliwa, omutekulu gwandje ye okwa pita mo nale megumbo ye ta ningi omasiku inaa galuka,” omukulupe ta yelitha.
Ta ti sho ta ka galuka omwedhi gwa landula ko a teta openzela, ashike sho te ya, oteya ikahe ya owala, oha end nokafuko ke.

Ta gwedha po ta ti ke na nkene e na okuninga, ke nasha oonkondo, nenge oshimaliwa oku fala omwanamati koshipangelo, oshoka ngele ya landa uusila, okapakete koohi nekende lyomagadhi, megumbo iha mu kalasha. Iimaliwa ayihe ohayi yi nomutekulu.

“Megumbo ohandi kwathelwa ashike komutekulu gwandje ngoka gwoomvula ndatu, oye ha kwatha ndje miilonga ayihe. Yina ngoka a valwa komumwaameme kadhona onkene a yile moAngola. Okanona hoka ko okena uuthemba ihe ihaka kwata iimaliwa yuunona wu li moluhepo ngaashi uunona ukwawo,” Mbinga ta ti.
Shilungileni ye nande a adha omimvo dhopezela, ye iha mono oshimaliwa kepangelo, oshoka ke na okatse, ta ti nkele a valwa onzapo no kamutse kaNamibia keyi shi.

Kansela goshikandjohogololo shaEtayi Johannes Elisa okwa lombwele Kundana kutya ehokololo lyi li ngaaka okwali eli lombwela oshiwike sha zi ko, ashike ethimbo ndjoka okwali e na omazepo.
“Otandi keya talela po noku ka pwiikina ehokololo alihe oshiwike tashi ya, no nando osha kala ngaa shili nale mopologalama yandje. Ehokololo ndika okwali ndeli lombwelwa komulumentu gopuushinda shawi,” Elisa ta yelitha.

Kansela okwati ota kambadhala na ashihe ta vulu opo a kale e ya kwathela ofamili ndjoka.
 


2019-08-16  Staff Reporter

Tags: Khomas
Share on social media