Okudja odula ya dja ko fiyo neudo okwa lopotwa oibofa yeengodi depeke adishe kumwe dili 186 da vakelwa modolongo komandiki omavyulonghalo moshilongo ashishe.
Omudo 2020 okwa lopotwa oibofa 110 yeengodi dopeke da hangika novanadolongo eshi tashi ulike kutya paife omuvalu owa weda lwa noibofa 76.
Oibofa yoingangamwifi 61 oya lopotwa okudja odula ya dja ko fiyo neudo omanga omudo 2020 okwa lopotwa oibofa yoludi olo ili 73, eshi tashi ulike kutya oya shuna pedu noibofa ine.
Edi oda popiwa komupopiliko woshikondo shemavyulonghalo moNamibia Assistant Commissioner Salmi Hangula eshi a ninga eenghundafana naKundana Etitano.
Okwa ti ovanadolongo onghee ngaa natango tava twikile nokutwa neengodi eshi hava kala tava va kelwa eengodi kovanhu ngeenge tave uya okutalela po.
Okwa yelifa ta ti ovanambelewa alushe ohava longo nodjungu okukala tava ningi omapekapeko komavyulonghalo noshoyo ngeenge ovapambele ile ookaume nokahewa vovanadolongo ve uya okutalela po ile ngeenge ovanadolongo kwa li vaya kondje yevyulonghalo.
Okwa ti elalakano opo ku ta like ngeenge ovanadolongo ove na eengodi dopeke noshoyo ngeenge ovanhu ovo ve uya okuvatalela po ove va e tela eengodi ile oingangamwifi.
“Ohatu ningi omitumba opo tu yandje ouyelele nehongo koshiwana opo shi kala sha xulifa po oku e tela ovanadolongo eengodi noingangamwifi shaashi nyika oshiponga,” Hangula ta ti.
Onghee okwa ti moule wemweedi da pita okwa didilikwa oibofa yeengodi ta di kwatwa novanadolongo ya shuna pedu sha etwa konima eshi oshiwana sha pewa ouyelele wokukala ve shi xulifa po.
Hangula okwa ti ovanadolongo vovalumenhu ovo unene hava kwatwa neengodi dopeke eshi hava kala ve li mekwatafano novanhu kodje.
“Ovanadolongo ohava kala tava longifa eengodi noinima ya nyika oumbudi noshoyo oulingilingi shaashi ohava kala tava tula ovanhu mokatoo noshoyo okukala tava ningile omatilifo oonakuninga oihakanwa ovo va longelwa ominyonena,” Hangula ta ti.
Okwa weda po ta ti oshikondo shomavyulonghalo ota shi kwashipaleke kutya komandiki ayeshe oku na elandufano opo ku kelelwe oinima ya nyika oumbudi.