New Era Newspaper

New Era Epaper
Icon Collap
...
Home / Oita ohai li Heita …A yashwa vati eshi a li ta ningile sekuliti omunyeka

Oita ohai li Heita …A yashwa vati eshi a li ta ningile sekuliti omunyeka

2022-06-10  Festus Hamalwa

Oita ohai li Heita …A yashwa vati eshi a li ta ningile sekuliti omunyeka

Omulumenhu weedula 33 okwa yashwa nondjebo monhulo komukeleli womaliko eshi vati kwa li ve li navakwao taku fekelwa kutya ookalyamupombo vakwao tava ponokele omukeleli womaliko.

Nakuninga oshihakanwa oku li moshipangelo shaNandjokwe ta mono epango. Oshiningwanima eshi osha ningwa Etivali efimbo lokonguloshi kOluno mOndangwa.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti omukeleli womaliko okwa ha ngika eli moilonga kookalyamupombo vatatu ndele tava tameke oku mu pula oimaliwa nongodi yaye yopeke.

Vati okudja opo ovafekelawa ova nukila omukeleli womaliko ndele tava mu nyeke ongodi yaye yopeke yongushu yoshimaliwa N$1600.  Omufekelwa ou a ya shwa vati tete okwa tula omukeleli womaliko koshi e kwete ombele yokapi ta ti kutya ote mu tu ngeenge ita popi apa pe na oshimaliwa.

Opolifi oya hokolola tai ti omukeleli womaliko okwa kufa ondjebo yaye ndele ta lombwele omufekelwa kutya ote mu ya she ngeenge ina hala oku mu efa ashike vati omufekelwa oo okwa kala ashike e kwete omukeleli womaliko. Vati omufekelwa okwa kala ta twikile nokulwifa omukeleli womaliko eshi a kala ta kondjele ondjebo yaye.

Okudja opo vati omukeleli womaliko okwa ya sha omufekelwa oo loikando ivali monhulo.

Ookalyamupombo vakwao ova nyeka ko diva ondjebo yomukeleli womaliko ndele tava faduka po nayo. Ondjebo fiyo onena vati ina i monika noonakufadukapo inava kwa po fiyo opapa. Natango opolifi oya hokolola tai ti efiku tuu olo omukainhu weedula 28 naye okwa ponokelwa kookalyamupombo tuu vo, eshi ve mu nyeka oshimaliwa shi fike N$2000.

Omukainhu oo vati okwa patulula oshibofa efiku olo poshitaashi shopolifi mOndangwa.

Opolifi otai pula moshiwana kwau e na ouyelele kombinga yovafekelwa ava opo a kale a lopotela opolifi diva.

Omukeleli womaliko ina kwatwa po onghee oshibofa osha tu minwa komhangu nomakonakono opolifi otaa twikile.

fhmalwa@nepc.com.na


2022-06-10  Festus Hamalwa

Share on social media