New Era Newspaper

New Era Epaper
Icon Collap
...
Home / Okaana ka fila moixwa koutalala … Ova ka nangala moixwa eshi va vaka omakasha oxuxwa

Okaana ka fila moixwa koutalala … Ova ka nangala moixwa eshi va vaka omakasha oxuxwa

2022-07-05  Festus Hamalwa

Okaana ka fila moixwa koutalala … Ova ka nangala moixwa eshi va vaka omakasha oxuxwa
Top of a Page

Okaana kokakadona komido hetatu oka xulifa omanga kakwao komido omuwoyi ke li monghalo ii, konima eshi va nangala oufiku aushe moixwa.

Okaana kamwe komido 10 kokamati oka xupa ke li monghalo i li nawa.

Otaku hokololwa Anna Angula pamwe noumatyona vambulavo vavali va faduka po eshi vati va lya mo okapana komakasha eexuxwa meumbo lavo.

 “Ounona ova faduka po shaashi okwa li va tila okudengwa,” umwe womovakapata ta hokololele Kundana.

Eshi kwa ka toka, ounona vati ova tokola opo va nangale pokavale ke li konyala eekilometa heyali okudja peumbo lavo. 

Keengulasha, lwopo 05h00, okaana aka komido 10 vati oka shuna keumbo oko akeke, ashike inaka popya kutya vakwao ove li peni.

Ovadali ova kala nee va limbililwa kutya ounona ove li peni. Onghee naashi osha eta opo va kale va shivifila opolifi i dule oku va kongifa ko.

“Omukulu wange (xe yokaana komido 9 naaka komido 8, ye oye mwene weumbo) okwe uya okulombwela nge kutya ounona ova faduka po eshi kwa li tave va pula kutya omolwaashike va lya mo omakasha. Okudja opo otwa ninga onghendabala opo tu ye koradio tu ka yandje etumwalaka kombinga younona va kana,” Helaria Kalenga, ina yanakufya Anna ta hokolola.

Okwa hokolola ta ti manga va hangika va uka koradio okwa dengelwa ongodi kutya ope na ounona vavali va nangala moixwa ashike vati kamwe kake na omwenyo.

“Eshi twa ya konhele oko otwa dimbulula kutya ounona ovambuletu. Onda dengwa pomutima kefyo lokaana kange okativali kokaadona,” ta hokolola.

Kalenga ta hokolola ta ti okaana kaye okwa li e ka pa mumwainamati ou eli mwene weumbo opo e ka tekule.

Okwa weda po ta ti ngeno ounona ova ile nande okeumbo laye va ka hondame shaashi eumbo lavo oli li ashike mekove limwe neumbo lomukulu waye omu hava di ngeno oshiponga osho inashi holoka.

Pefimbo Kundana a talela po eumbo olo, mwene weumbo ina hangika mo omanga omukulukadi waye oku li koshipangelo kOnandjokwe a kalela okaaana kakwao ke li meembete.

Okaana ke li koshipangelo otaku hokololwa kutya vati oka li monghalo ii, ashike paife otai ende tai xwepopala.

Eshi Kundana a pula onomola yamwene weumbo, ovakwapata vomushamane va hangika meumbo ova anya okuyandja ongodi yaye yopeke shaashi vati omushamane ina hala okupiyaanekwa.

 Ounonoa vavali voumati ova dalwa komushamane mwene weumbo.

Olutu laAngula oli li kokila koshipangelo shaShakati tali ningilwa omakonakono.

fhmalwa@nepc.com.na


2022-07-05  Festus Hamalwa

Share on social media
Bottom of a page