Okaana kokakadona keedula omuwoi oka fya, ke limangeleka Etivali potundi 21h50 kolukanda Maltahohe moshitukulwa shaHardap.

Nakufya okwa tongololwa oye Vadiminapo Engelbrecht omunafikola pofikola Reverend PA Schmit Primary School, kwa li e li mondodo onhivali.

Omupopiliko wopolifi moshitukulwa shaHardap Inspector Linea Heita okwa hokolola ta ti okaana oka lundilwa komushiinda wavo kutya oka vaka oshimaliwa N$50 mondingosho yamushiinda shavo i li popepi neumbo lavo.

Efiku tuu olo konguloshi okaana okwa li ka handuka vati nokonima yefimbo oka ya monduda yaxe ka ka nangala.

Opolifi oya ti manga xe e li pendingosho pondje mboli okaana oka kufa ongodi ndele take limangeleke.

Vati mumwainamati ha di meumbo omo okwa hanga okaana ke li meemhango ka fya nale nokonima okwa shivifila ovanhu kwa li ve li pondingosho yamushiinda opo.

Opolifi oya ti kape na omunhu ta fekelwa mefyo lokaana aka onghee omakonakono opolifi otaa twikile.

- fhamalwa@nepc.com.na