Festus Hamalwa

Okakadona keedula 12 oka kwatwa onghonga vati kumumwainamati weedula 22 ndele ta ka pewa eteelelo. Opolifi oya ti okakadona paife oke na eteelelo leemwedi nhatu, vati ko oka kala nokukwatwa onghonga loikando ihapu. Oshiningwanima eshi osha ningwa pokati komwedi Juli naJuni komukunda Oikango moshikandjhoololo Outapi, moshitukulwa shaMusati meumbo lavo.

Omukonakoni woimbuluma wopolifi moshitukulwa shaMusati omupedu Commissioner Moses Simaho okwa hokolola ta ti omufekelwa okwa kala nokuningila ondenge yaye omatilifo kutya ote i dipaa ngeenge oya lombwele ovaneumbo kutya oha i nayo moixulo.

Onghee vati okudja opo nakuninga oshihakanwa okwa kala nokungilwa omunyonena wopaixulo ashike okwa kala e na oumbada wokulombwela ina meumbo.

Opolifi oya ti omufekelwa okwa kwatwa po nota holoka momhangu yaOutapi Etitatu eshi ta pangulilwa oshibofa shekwatonghonga. Eshi a kwatafana naKundana ina yakakadona oo oshihakanwa okwa hokolola ta ti ke udite ombili eshi okaana kaye ke li mondodo onhihamano ashike paife oka pewa eteelelo.

Okwa hokolola ta ti tete okwa mona olutu lokaana kaye tali ende tali lunduluka onghee okudja opo okwa pula okaana kutya oshike ke na edimo lakula.

“Okwa lombwela nge kutya oku na eteelelo lomukulu waye ou vati a kala nokuya naye moixulo. Okudja opo onda shivifila opolifi fiyo omufekelwa ta kwatwa po.”

“Onda kumwifa koshikumungu eshi. Omufekelwa okwa ya elihongo lokaana kange moshipala shaashi paife ita ka kala vali ke litula mo moilongwa yako,” ina yokaana ta ti.

Okwa ti okwa ninga onghendabala yokukwatafana neendokotola opo eteelelo lokaana li kale la kufwa mo ashike vati eendokotola ode mu lombwela kutya eetelelo ola kula nale onghee itali dulu vali okukufwa mo. Okwa weda po ta ti nakuninga oshihakanwa paife oku li moshipangelo ta mono omayakulo exungomwenyo.

Eshi a kwatafana naKundana minista woukashikekookanhu nonghalonawa yokaana Doreen Sioka okwa ti omulumenhu ou vati a mitika okaana okwa pumbwa okupewa ehandukilo lopaveta shaashi okwa longa oshimbuluma sha kula shekwatonghonga eshi a ya moixulo nokaana ke na eedula ina di fika.

Okwa ti kape na omulumenhu e na oufemba wokukala a ya moixulo nounona vashona onghee ku keshe ou teshi ningi ota kala a kwatwa po diva.

“Paife omulumenhu ou okwa ya onghalamwenyo yokaana moshipala shaashi itaka dulu vali okulihonga nelitulemo,” minista ta ti. Okwa kumaida ovadali opo va xulife po okukala tava e fa ovalumenhu tava i moixulo nounona vavo shaashi eshi oshi li omahepeko omomaumbo.

Okwa weda po ta ti ovalumenhu ve li mekwatafano lopaihole nounona va shona nava lopotwe keembelewa doukashike kookanhu nonghalo nawa yokaana.

fhmalwa@nepc.com.na