Shipi Elago

ONDANGWA-Oshitunda Namibia osha li sha yambekwa naatondoki dhingi mboka oyendji ya li ya dhana onkandangala muudhano woateletika omanga oshilongo sha li moompango dhaSouth Africa, Kundana okwa li a talele po gumwe gwomomanyakwa ngaka, omunamivo 64, Lazarus kapolo pegumbo lye popepi nOndangwa, ngoka a li e tu kuthileko ko konakuziwa ye oyamba yomawudhano.
Edhina Lazarus Kapolo unene kwaamboka ya li ye na omeho lwopomimvo dho1970 edhina lyimwe lya shanga ondjokonona nolya li ha li tilika muudhano woateletika kaaku na we oshoka omulumentu nguka okwa li ha kutha oonkali pepata kape na okwoongaaonga.
Lazarus ngoka olundji a kala a tseyika nawa unene tuu kaalanduli ye onga Kapei oku li omvalele yOkaku kIipupu, omukunda gu li muumbangalantu wondoolopa yaShakati.

“Onakuziwa yandje yomawudhano oya tamekela mOngwediva High School mo1975 , opwa li pe na ethigathano hali ithanwa SWASAU “South West Africa School Sport Union” moka oosikola dhokevi lyiimpungu dha kala hadhi thigathana po noosikola dhokuumbugantu woshilongo,” Kapei ta ti.

Ethigathano ndika olya li hali kala ko miitopolwa ngaashi Damaraland, Windhoek nOkavangoland, moka Lazarus kapolo a li a kutha ombinga  miinano ngaashi oometa 800, 1500,3000, 5000 nomometa 10 000 moka ayihe mbika a li a komonene kekothi nokwa li e ya omutango miinano ayihe omumvo ngoka.

Omimvo dho1970 odhi shi kuhokolola Kapolo nawa oshoka okwa li a pangele iinano ya zi nokutumbulwa uule konyala womimvo ndatu dha landulathana - 1976,1977 no 1978.

Mo1979 Kapolo okwa li a thigi po evi lyiimpungu na okwa li a yi koCDM, ano kOranjemund konima sho a li a zala okaholo, gwonale okwa tile omukongo iha endele shimwe, Kapolo nando kOranjenmund okwa li a endela iilonga okwa li wo a kutha ombinga muudhano mboka e hole shinene woateletika waCDM.

“Onda li nda kalele po CDM muudhano wa yooloka muSepetemba 1979 onda li nda kalelepo omina muudhano wa li moRSA moka nda li nda thigi oyendji ya lala miinano ngaashi moometa 800,1500,noometa 5000.

Oyendji oya li ya haluthwa kuKapei sho a li a ningi omulumentu gwotango okumatuka oshinano shoometa 800 muule wethimbo lyo 1:57.03 muSWA ngaashi Namibia a li ha ithanwa nale pethimbo ndiyaka.

Esindano ndika olya li lya yelutha omeho gaanambelewa yomawudhano pethimbo ndiyaka naKapolo okwa li a hogololwa opo a kakalele po oshilongo methigathano lya li koPocefstroom shaSouth Africa moka a li a yi sigo okedhingoloko lyahugunina moka a li a e ya pehala etihamano.

Momumvo gwa landula ko Kapolo okwa li wo a hogololwa ishewe opo a ka kalelepo oshilongo kethigathano lya li koPretoria shaSouth Africa moka a li e ya omutiyali moshinano shoometa 800 nethimbo epe muudhano mbuka lyo 1:48.09.
Ethimbo lyaLazarus lyokumatuka moometa 800 olya li lya teywa ku Mark Handelsman ngoka a li a matuka oshinano shika muule wo 1:46.07, nongashiingeyi oshinano shika otashi pangelwa kuDaniel Nghipandulwa ngoka a li a eta po ethimbo epe mo 10 Apilili 2011 sho a li a matuka 1:46.62.

Lazarus Kapolo ngoka ngashiingeyi e li moshipundi shevululuko okwa holola kutya oku li ha kwathele momawudhano gwoateletika gwoosikola unene tuu miitopolwa yokonooli okukwathela okugandja uunongo mboka a likola pethimbo a li omudhani.
Okwa li a holola wo kutya oshilongo shetu oshi na aadhani oyendji ye na iitalenti ashike kaye na aadhewuli ya pyokoka naashika ohashi eta aadhani mbaka ya putuke ye na omapuko giigalala ngoka haga ke ya petha nambwa momathigathano gwopamuthika gwopawuyuni.
Okwa ti wo uunona owundji owa nika uundende nowa pumbwa okutsuwa omukumo opo wu vule okukala hawu idhewula nokumatuka wa mana mo.

Namibia okwa kala e na aamati haya kutha oonkali pepata onkene onjokonona yoateletika moNamibia otayi ndopa ngele inayi tumbula omadhina ngaashi nakusa Daniel Haitembu ngoka ethimbo lye moshinano shoometa 400 ina lyi tewa sigo okonena konima sho mo 26 Apilili 1980 a li a matuka oshinano shoometa 400, omanga muuyuni oshinano shika tashi pangelwa kuWayde Van Niekerk ngoka a li e shi matuka muule woominute 43.03 muudhano wOlympic wo2016.
Omanyakwa omakwao ngoka ga li ga dhana onkandangala pethimbo lyuukoloni ongaashi Gerhard Barnard, Herman //Garus-Oab, Rooi Motert, Frank Kyele, Frank Fredericks, Lucky Gawanab, Santie Binneman naAbes Soabeb okutumbula po ashike yamwe.