Ovakwashiwana vomomukunda Okambebe ova hoolola Arnolf Uahengo opo a ninge mwene womukunda wavo mupe.

Uahengo okwa ulika Olomakaya keembelewa delelo laUkwanyama pefimbo okwa li okalimo vomomukunda Okambebe noshoyo elenga lakula loshikandjo Omungwelume Linda Mwaetako va li va shakena. 

Omudo wa dja ko elelo laUkwanyama ola tula pedu pakafimbo mwene womukunda waKambebe Fillemon Nghipangwa konima eshi kwa li vati a patela oikulya yoshikukuta mondingosho yaye ndele tai ningi nai omanga oikulya imwe mwa kwatelwa omakende omaadi neendoxa deeshi okwa li vati da kupulwa moixwa kuNghipangwa.

Ovakwashiwana okwa li va ninga omunyano wopambili tava pula Nghipangwa a kale a kufwa moilonga.

Onghee naashi osha eta opo elelo laUkwanyama li tule Nghipangwa pedu okudja omudo wa dja muMei.

Nghipangwa okwa kala yoo vali ta ningilwa omakonakono omo vati ta fekelwa kutya oha tendulula omadu ovanhu noku yandja omadu kofamili yaye.

Moshipopiwa shaye Uahengo okwa ti ota ka yandja eembapila domadu kovanhu ve na omadu ehe li komadina avo.

"Ohandi ka kwashipaleka kutya ohandi ka yandja eembapila kovanhu va pumbwa omayakulo keembelewa da yooloka," ta ti.

Okwa weda po ta ti ota ka longela kumwe noshiwana noshoyo okukale po ombili momikunda.

Omupopiliko welelo laUkwanyama Andrew Naikaku okwa koleka ta ti okambebe oka mona mwene womukunda mu pe.

"Eenamanana edi da li momukunda Okambebe oda kandulwa po paife," Naikaku ta ti.

Okwa hokolola ta ti elelo laUkwanyama ota li lalakanene oku ka lekapo ombili momikunda.

Eshi a kwatafana naKundana Fillemon Nghipangwa okwa ti okwa li a dimina opo a kufe ombinga momahoololo okufindafana naUehenga ashike okwa shangela ombapila kombelewa yokandjo shavo ta ti kutya ina hala vali.

"Onda hala okukafuda po. Ina ndi panda omikalo dovakwashiwana vomOkambebe," Nghipangelwa ta ti.

fhamalwa@nepc.com.na