Victoria Kaapanda
ONGWEDIVA –“Aashinda sho ye ya, oya adha a lala pombete –a sa –nokamwana koomvula ndatu (3) ka kothela metente lyombizi yayina, taka ti yina okwa kotha owala, ota penduka.”
Lucina Mwoombola ta popi ye ta hekumuna mokudhimbuluka eso nonkalamwenyo yomumwayinakadhona Lusilia Quimbra (30).
Quimbra anuwa okwa dhipagwa kuEdward Haihambo a tseyika nawa nedhina Eddy (31) ngoka a li kuume ke komiihole ye oye he yaanona ye yeli yaali –kamwe okomimvo ndatu, nokawo komvula netata. Kumwe nakusa Quimbra ngoka a li ha ithanwa nedhina Bunita, okwa li e na aanona ya ne.
“Shilandula shandje, pokati ketu ka kwali to tile po omeya, okwali kuume kandje kopothingo oye gumwe maamwameme kwali twa imangulukila no tu holathane unene. Okwa thiga ndje noshilalo oshinene shi na oku pula ethimbo opo shi pole,” Mwoombola ta popi neyeme.
Ta hokolola ta ti ota dhimbulukwa nkene a kala ta kondjo nomumwayina kadhona opo andola a thige po omulumentu ngoka a kala te mu hepeke ethimbo nuule.
“Onda kondjo nakehe shoka ta ndi vulu, ihe ina ndi pondola sha. Ohaya topoka owala ethimbo ndjoka taya tanguna ihe sho to ka uva antuu oya monika yeli pamwe.”
Ta gwedha po ta ti iiwike iyali ya pita po okwali a dhimbulula oshilalalo moshipala shamumwayina, lwopeho, naasho e mu pula kutya okwa ningwa koshike, okwa yamukula tati okwa ipuma momuti.
“Ashike ndi shishi kutya ota fundju oshoka kehe thimbo e na oshilalo kolutu okwa dhengwa owala kuEddy,” Moombola ta ti.
Okwali e mu thiminike opo e mu lombwele oshili sigo a popi kutya okwa dhengwa ku Haihambo.
Moku hokolola shoka sha ningwa po esiku ndjoka lyedhipago, Mwoombola okwa ti, Haimbodi naQuimbra oya li ya monika Olyomakaya pehala lyomanininwo ya nyanyukwa li li pamwe nuunona wawo une. Ta ti Quimbra kali nande ha thigi po uunona we.
Sho ya yi kegumbo, iikolokosha oya tukuka.
“Aanona sho ya mono aakuluntu taya kondjo oya tondokele puushinda. Ashike hoka komimvo ndatu oka ka kala po, oshoka okali ke hole yina noonkondo.”
Sho aashiinda ya ka thika oya adha nale Quimbra a hulitha, a nyanyagulwa koshipala, ye okwa teka okwaako.
“Sho nda thiki poshiningwanima okwali nda ngwangwana nayi. Onda matukile mondunda moka mwalala mumwameme ndi katale ngele oye tuu shili, ashike oshipala she ka ndali ta ndi shi dhimbulula oshoka osha nyanyuka nayi. Onda ndhimbulula owala kutya omuntu ngoka a dhipagwa omumwameme shili, sho nda tala kolutu…
“Okwali omukadhona gombili, omunankondo gomashendjo ga kehe thimbo… okwa thiga ndje pomutenya,” ta popi nomahodhi taga tondoka.
Haihambo omulumentu ngoka a li a dhidhilikwa ihaa pu modholongo omolwa iilonga iiwinayi ha longo moshigwana.
Otaku hokololwa a li moombete mOsipangelo shaShakati, e li miikaha yopolisi, mono a impweya mo, opo a ka longe iihuna mbyoka. Okwa kala ta kongwa kopolisi oku za esiku a iyaka moshipangelo. Nguka anuwa okwali a kwatwa po shina sha nuufuthi oomwedhi dha zi ko. Okwa iyaka mo moshipangelo momasiku 24 gaAguste anuwa sho a pula aapolisi mboka ye mu kalela opo ye mu kuthe mo miiketanga oshoka ita vulu okulya.
Mwoombola okwa ti okwali a tila sho a vu kutya omulumentu ngoka okwa za mo modholongo oshoka oha ningi onkalo yamumwayina odhigu. Kali e na mpo ha zi oha kala owala a lamba mpoka pe na Quimbra.
Sho a iyaka momake gopolisi, okwa ningi owala esiku a edhililwa kuQuimbra mandjawo, mEvululuko, sigo esiku ndjoka e ke mu dhipaga, e ta fadhu ka po.
Pahokololo lyopolisi, omutamanekwa ngoka okwali ka a adhika komukunda Odimbwa, moshikandjohogololo shaEtayi mOshitoplwa shaMusati kooyinakulu ngoka a vala he.
Meholoko lye komeho gamengestrata Toini Shilongo mopmangulilo mOshakati, Haihambo kali a pulwa a tye sha. Okwa tseyithilwa uuthemba gwe, kutya ota vulu oku kalelwa po komukalelipo gwopaveta gwopaumwene, nenge a ninge eindilo koLegal Aid, opo a mone hahende ta futwa kepangelo.
Okwa tegelelwa a ka holeke ishewe komeho gompangu mo29 yaKotomba nuumvo. Kakele kedhipago, Haihambo ngoka ta tamanekelwa oshipotha shokuyaka, omunyeka oshowo oku iyaka mondjedhililo, ka li a pulwa a tye sha kombinga yiipotha ye.