New Era Newspaper

New Era Epaper
Icon Collap
...
Home / Okanona ka si sho ka pi komeya omapyu

Okanona ka si sho ka pi komeya omapyu

2020-12-08  Victoria Kaapanda

Okanona ka si sho ka pi komeya omapyu

Okanona komumvo gumwe oka si kuululume wiilalo, sho ka pi komeya ga fuluka. Oshiningwanima shika osha ningilwa momukunda Okatope moshitopolwa shaShikoto.
Omukuluntu gwopolisi moshitopolwa shaShikoto Armas Shivute okwa ti, okanona hoka oka li ka pi Etitano lya zi ko lwopotundi 20h00 yuusiku, noka hulitha konima yomasiku gaali. 

“Okanona hoka oka li ka hulithile megumbo Osoondaha. Otaku hokololwa kutya okanona hoka kakwa li ka falwa koshipangelo konima ka pi komeya, nonando otaku ti oka li k api shinyanyaleka kombunda,” Shivute a popi ngaaka.
Kape na uuyelele natango kutya, oshike okanona inaaka falwa koshipangelo ethimbo ndyoka ka li ka pi, omanga taku hokololwa kutya oka li ka pya shinyanyaleka.

Ta ti, oka li ka hulitha kuululume wiilalo konima yomasiku  gaali ka kala megumbo. Yina yo kanona hoka anuwa okwa kala kOvenduka.
Shivute okwa ti, aniwa okanona hoka oka li nomumwayinagona gwomimvo 21, ngoka a li ta fulukitha omeya, no kanona oka li ka gwile mombiga ndjoka yomeya,  eta kapi kombunda ayihe.
Oka tseyika nedhina Anna Ndeshipewa Shoolongo.

Moshiningwanima inaashifathana omunamimvo 45 okwa si omeya, sho kwa li ta iyogo mondama yomeya mOshikuku.
Omukuluntu gwopolisi moshitopolwa shaMusati Titus Shikongo kwa ti, oshiningwanima shoka osha holoka Etine lya ziko molukanda Ombwa ya lyata otina, ethimbo lyomutenya.

“Nakusa okwa li pamwe na kuume ke, kwa li taya iyogo pamwe mondama. Otaku hokololwa kutya aalumentu mboka halo lwotango taya iyogele mondama moka,” Shikongo ta ti ngaaka.
Shikongo tahokolola ta ti, kuume ke ngoka a li naye, okwa li a kwatwa kuumbanda nokomalimbililo sho amono kuume ke, itaa ziko kohi yomeya.

 Okwa li a eshil opotele aashinda nokudhengela opolisi meendelelo, ndyoka ya li yeya okukongamo olutu momeya.
Nakusa okwa dhidhilikwa nedhina Jesaya Rehabiam, a yambukile momukunda Oshipumbu Shomugongo.
Aakwanezimo oya tseyithilwa nomakonakono gopolisi oge li metifa,
Shikongo okwa ti, okwa dhidhilike wo omwaalu ogundji gwaantu taya sile momeya, moondama oshowo momatale nuunene uunona womimvo omishona.
Ta ti, omeya oga nika oshiponga, onkene aakuluntu naya kale ye na esiloshimpwiyu naanona, omvula oyi li po kuloka niishana otayi ka kala yuudha omeya.


2020-12-08  Victoria Kaapanda

Tags: Khomas
Share on social media