Victoria Kaapanda

Opolisi moshitopolwa shaMusati oya fala omudhimba koshipangelo  shaKahao, gwokanona komimvo heyali ka gwile momuthima gwomeya Etiyali lyoshiwike shika.
Omukuluntu gwopolisi moshitopolwa moka Titus Shikongo okwa ti, oshiningwanima shoka osha holoka potundi 12h25 yomutenya momukunda Olukekete momudhingoloko gwOutapi. “Otaku hokololwa kutya okanona hoka, oka li namukwawo gwomimvo hamano, ya li ya ka teka omeya komuthima ngoka aniwa gu li kokule kashona negumbo nomahela ge thike poolita ntano,” Shikongo ta ti ngaaka.
Ta ti, okanona hoka sho kwa li taka pindi omeya nehela, oka thenunukile momuthima gwomeya, omanga okakwawo kali ka thikama kooha.
Oka li katondokele kegumbo ka katseyithile aakuluntu, sho ya ka thika oya adha a sa nale omeya.
Okatsyika nedhina Tresia Kalipi, a yambukile momukunda omo tuu moka.  Shika osha ningwa omasiku omashona ga piti po, sho okanona komimvo hamano ka li ka lyatwa kohauto momukunda Onampira moshitoplwa shaMusati.
Otaku hokololwa kutya okanona hoka oka li taka ende kooha dhopate nayakwawo yatatu, e taka tondokele mopate e taka lyatwa kohauto nokusa. 
Aakwanezimo oya tseyithilwa, nomakonaakono gwopolisi oge li metifa.