Okanona komimvo ntano oka si sho ka nukile metale lyomeya nelalakano lyokuyoga, oshiningwanima shika osha holoka momukunda Onandjaba moshitopolwa shaMusati mEtitatu lyoshiwike shika.
Shika osha holoka ashike esiku limwe lya piti po sho okanona komimvo heyali ka gwile momuthima, sha li sha ningwa mEtiyali momukunda Olukekete mOutapi, moshitopolwa omo tuu moka shaMusati.
Omukuluntu gwopolisi moshitopolwa moka Titus Shikongo, okwa ti  oshiningwanima shoka osha holoka potundi 16h30 yomutenya momudhingoloko gwaKalongo.

“Otaku hokololwa kutya okanona hoka komimvo ntano okwa li taya dhana pamwe nayakwawo ye li yaali, gumwe gwomimvo omugoyi nagumwe omukuluntu kuyo gwomimvo 11, ya li taya dhana popepi netale mpoka pe na omutamo gwomita 1,5 negumbo lyawo,” Shikongo ta ti ngaaka.
Ta hokola ta ti, okanona hoka oka li ka zi puyakwawo taka tondoka nokunukila metale nelalakano lyokuyoga omeya. 
Yakwawo okwa li ya mono a ningine kohi yomeya, noku ka tseyithila aakuluntu kegumbo.
Sho aakuluntu ya thiki petale, oya adha nale mwa kaha. Nakusa okwa tseyika nedhina Bertha Kalinasho Haihambo.
Aakwanezimo oya tseyithilwa nomakonaakono gopolisi oge li metifa.

Shikongo okwa kumagidha aakuluntu, konima a dhimbulula kutya omaso gwuunona wu na oomvula oonshona otaga yi pombanda. Ta ti, aakuluntu naya sile aanona oshimpwiyu.
“Omeya oshinima sha nika oshiponga, unene kaanona. Ndika kali shi ethimbo lyomvula, ihe omaso guunona tawu si komeya otaga yi pombanda,” Shikongo a popi ngaaka.
Okwa gwedha po ta ti aakuluntu naya kumagidhe aanona kaaya dhane yo ya kale kokule nomithima, omatale oshowo oondungu dhomeya.