Loide Jason 

WINDHOEK- Omakonaakono gopolisi moshipotha shaakwashigwana yAazimbabwe yatatu  mboka taya fekelwa moshiningwanima oshinene shinyanyalitha shokanona kokakadhona hoka ka dhipagwa nokufikwa ka lungwina otaga ulike kutya nakusa ngoka okwa li a dhengwa mOmaandaha omanga ina hulitha. Omukuluntu gwopolisi ngoka e li omutse gwoshikondo shokukonaakona iimbuluma iinene moshilongo Commissioner Nelius Becker, okwa hokolola kutya aakonaakoni yoshipotha shoka moka ye woo naye a kwatelwa mo oya gongele uuyelele puushiinda kutya okanona hoka ke li oko akeke kokakadhona komegumbo ndyoka lyAazimbabwe oka li ka dhengwa nayi mOmaandaha ashike ita vulu okupopya kutya oka dhengwa kulye oshoka otashi yi omakonaakono moshipala.
Okanonakadhona komimvo omugoyi oka li ka si eso li nyanyalitha ee ta lungunithwa po ndele olutu lwako ndoka talu umbilwa mepoto lyiiyagaya lyamuni mOlyomakaya gehuliloshiwike lya zi ko.
Becker okwa hokolola kutya maakwashigwana mboka ya mangwa omwa kwatelwa yina yanakusa ngoka e li omupangi moshipangelo shoka itashi popiwa kedhina mOvenduka molwomakonaakono gwopolisi. Yamwe woo aayihokanathani ye li yaali mboka ya li ya mangwa moshitopolwa  shaTjozondjupa komatango gwOmaandaha gwoshiwike shika.
Olutu lwanakusa olwa li lwa monika kokathano talu umbilwa mepoto komukiintu nomulumentu mboka ya mangwa, lu li mokatoololi kokuundula iikulya na aniwa mokatoololi omo tuu moka omwa adhika oshiti shoshikombe sha teka nokahema ke na oombinzi ka fikwa. “Ayihe mbyoka ya adhika poshiponga mpoka otwe yi kutha ko notatu yi longitha onga omakonaakono getu oshoka omakonaakono moshinima shika oge li natango petameko,” osho Becker a ti ngaaka.
Becker okwa tsikile ko kutya oya li ya landula omusinda gwokatololi hoka sigo opoondunda dhokuhiila poRhino park mpoka opo ya tameke oku ninga omakonaakono gawo.
Sho aniwa ya yi pehala mpoka tapu zi aafekelwa mbaka, inaya adha mo aantu  konima sho ya zi po ya yi puushiinda opo nee ya mono mwa tema ee taya konkola.
“Otwa adha mo yina yanakusa e eta tu mu pulaapula ngaa omapulo gwothaathaa oshoka katwa li natango twa mona uuthemao woku hadha nokuninga omapulo gomuule. Otwa shuna ee tatu galuka mOsoondaha ongula. Sho twa yi mpoka otwa adha yina yanakusa a ya kiilonga hoka twa yi twe ke mu tala.
Sho twe ya pegumbo oshoka out na uuthemba wokuhadha nokuya omakonaakono muule woshinima otwa pula a patulule po nokwati oshapi ye okwa li e yi gandja kumwayinagona. Sho a dhenge ongodhi otwa mona kutya okwali ta dhengele omuntu e li kondje yaVenduka,” osho omukonaakoni gwiimbuluma dhingi moshilongo a hokolola ngaaka.
Okwa ti mokupopya komukiintu nguka omwa li m una uumbangi wa gwana kutya naye oku na mo sha meso lyokanona oshoka inaya a ka lopote eso lyokanona nenge ekano lyokanona kopolisi.
Okwa gwedha ko ta ti kutya oya manga po yina yanakusa ee taya ningi woo omakonaakono gomuule sigo taya landula woo mboka ya monika mokathano mpoka ya ya sigo okOkakarara hoka ya mangelwa omanga y ali ye li mokataksi hoka woo ka li taka hingwa komukwashigwana Omuzimbabwe.
Oya li ya pulaapulwa sigo taya mangwa po. Becker okwa ti kutya nonande omadhina gwomunona ngoka oga li ga tumbulwa kuyina opolisi oyi li natango ya ipyakidhila nokukwashilipaleka kutya oge li mondjila nahe oku li peni.

Oshiponga 
Kapatashu mokukonaakona iimbuluma moshilongo okw ali a hokolola kutya sho ya manga po mboka yaali oya li woo ya londeke omukwashigwana omukwawo ngoka a li ta hingi oshoka okwa adhika ta hingi otaksi moshilongo omanga ina pitikwa oku shi ninga.
Mboka aniwa okwa li ya londo moshihauto shopolisi moka mwa li aapolisi yaali nAazimbabwe yatatu. Omanga ye li mondjila yu uka koVenduka oshihauto shoka osha li sha kondama ndele omulumentu ngoka e li omutamanekwa moshinima shoka sha popiwa pombanda okwali amono oshiponga na ngashingeyi okuli moshipangelo moVenduka shoka woo itashi tumbulwa molwomakonaakono gwopolisi moka ta mono uuhaku. Omukiintu ngoka e li omukulukadhi gwomufekelwa okwa za mo moshiponga ina ninga sha nuunona inawu ninga sha.
Omupolisi gumwe woo okwa li a mono oshiponga naye woo oku li moshipangelo ta mono uuhaku.
Aakiintu mboka yaali ngashingeyi oya tegelelwa okuholoka mompangu moVenduka mEtitatu.