New Era Newspaper

New Era Epaper
Icon Collap
...
Home / Okatomeno kaShakati ka pata ishiwe

Okatomeno kaShakati ka pata ishiwe

2021-10-15  Victoria Kaapanda

Okatomeno kaShakati ka pata ishiwe
Top of a Page

Victoria Kaapanda

Okatomeno kaShakati kedhina Eloolo hoka ka li ka patulululwa pehulilo lyomumvo gwa yi, sho kala ka pata okuza mo 2016 ka pata natango. Okatomeno hoka oka patululwa kepangelo, opamwe nehangano tali ithanwa KIAT oshowo ehangano lyaChina lyedhina Ningbo Agriculture Investment.

Sha ikolela kuuyelele wa gandjwa komunambelewa omukuluntu Sikunawa Negumbo, okatomeno oka pata omolwoondjo dhomayakulo ngaashi omeya nolusheno. “Nando twa kala melongelokumwe nehangano ndyoka lyaaChina “Ningbo”, olya ka kanitha ondjila ndjoka kwa li twa uvathana tu ende pamwe,” ta fatulula ngaaka. Ta ti, ehangano ndyoka okwa li lya uvaneke okutula oshilamaliwa oomiliona N$200, mehangano muka, ihe kape na shoka sha lya ningi po.

Negumbo owa ti natango etompelo limwe lyokatomeno sho ka pata, oshoka kutya kapwa li pe na iizemo yasha okuza mokatomeno. Aachiina oya kala noku tuma onyama ayihe koshilongo shawo, omanga Aanamibia itaya li onyama yomoshilongo shawo. Negumbo ta ti, okatomeno oka pumbwa oshimaliwa shi vule poomiliona 60, opo ka vule okupatuluka.

“Epangelo okwa li lya longitha oomilliona dha pita 10 oku opaleka okatomeno hako, okupitila muuministeli wuunamapya,” ta popi ngaaka. Ta ti, oya li ya kutu aanilonga ye vule 70, ihe pethimbo ndika oya tumwa komagumbo omanga taya kambadhala okukandulapo omukundu goka.

“Aanilonga inaya lalekwa miilonga sigo aluhe, oya li ya lalekwa kehangano lyoNingbo olyo alike omanga inaatu shi kundathana atuhe, ihe shoka kashili mondjila no itatu shi pitike, se ye hanagano lyo KIAT,” ta fatulula ngaaka.

Ta ti, oya kala noku konga omakwatho okuza mpeya na mpeya, nonando ya pamwe okwali ya tindilwa, opena nga mboka ya yamukula nomatumbulo taga etitha omukumo.

vkaapanda@nepc.com.na


2021-10-15  Victoria Kaapanda

Share on social media
Bottom of a page