New Era Newspaper

Icon Collap
...
Home / Okatumwalaka kokongodhi ka etele Wendelinus

Okatumwalaka kokongodhi ka etele Wendelinus

2021-12-01  Victoria Kaapanda

Okatumwalaka kokongodhi ka etele Wendelinus
Top of a Page

“Onde ku yuulukwa, otandi ku mono uunake?” Hoka oko oka tumwalaka kokongodhi hoka anuwa ka eta opo eshenge lya tseyika nawa, Wendelinus Ndiwakalunga Hamutenya (40) a tsuwe nombele lwiikando itatu komusamane gwe, Imannuel ‘Imms’ Jeremiah Hambiya (33). 

Hamutenya ngoka hi ithana kutya oye meeMaria Omuyapuki ngashiingeyi okwa taambelwa moshipangelo shepangelo moKatutura, omanga Hambiya e li mokakuma, a patululilwa oshipotha shonkambandhala yedhipago. 

Otaku hokololwa kutya aalumenhu mboka okwa li ya tameke oondjuma sho okatumwalaka hoka ka yakulwa kongodhi yaHamutenya. 

“Etumwalaka ndyoka okwa li lye ya mongodhi yandje shili, ihe olya zi konomola kandi yi shi. Shoka okwa li sha eta oondjuma sigo twa kondjo,” ta hokolola ngaaka.

Ta ti, sho omusamane gwe a kutha ombele yokapi, Hamutenya okwa matukile mondunda yimwe moka a li a ipatele mo, ihe shoka kakwa li sha kwatha sha.

“Okwa teya po omweelo ta tatula po ongodhi, ee ta tameke okutsa ndje nombele. Okwa tsu ndje iikando itatu mokwaako oshowo lumwe kondungu yegundji,” Wendelinus ta hokolele New Era.

Ta gwedha po wo kutya yoyene oya ninga esiku kaaye na nawa ombili. Ta ti, omusamane gwe okwa kala e na ongeyo, sho a li a pula okulandelwa ongodhi yongushu N$15 000, ihe Wendelinua pehala lyongodhi ndjoka a pulwa okwa landa ongodhi ya kotha oN$7000. Anuwa Hambiya okwa kala ta nyanyeta kutya, ina landelwa ongondhi ndjoka a pula oshoka nani okwa hala e ke yi landele ngoka te mu tumine omatumwalaka gohole. Natango okwa li a fatulula kaatolinkundana kutya, omusamane gwe oku li ashike mondholongo opo a longwe oshilongwa kutya shoka a ningi osha puka, ihe ina patululilwa oshipotha.

Ta lombwele wo aatoolinkundana kutya a monithwa oshiponga, natango ye okuhole omusamane gwe tagu pu mo.

“Ashike nande ongawo sigo ompaka kandi na etokolo ngele otatu tsikile okukala mohole nomusamane gwandje, etokolo ndyoka otali ka za kaakuluntu yetu atuhe,” ta lombwele New Era. Wendelinus okwa gwedha po ta ti, etokolo ndyoka edhigu kuye oku li ninga oyo awike, oshoka oye na okanona taye ka tekula ayehe yaali, onga aakuluntu ya ko.

Sha ikolela kepeko lyopolisi oshiningwanima shika osha holoka mOmaandaha lwopotundi 00:40 yuusiku momundhingoloko Freedom Square moWindhoek.  Hamutenya naHambiya oya tyapula edhimbuluko lyomumvo gumwe gwondjokana yawo kuyele omwedhi gwa zi ko. Mbaka oya li ya ka hokana paveta koSouth Africa muNovemba 2020 oshoka Namibia ina pitika oondjokana dhaantu yuukwatya wa faathana, ano oondjokana dhomashenge.

– vkaapanda@nepc.com.na


2021-12-01  Victoria Kaapanda

Share on social media
Bottom of a page