Victoria Kaapanda
ONGWEDIVA- Ookongo Village Council oya gongele N$254 900 mohungi yokugongela oshimaliwa shomawuliko giipindi mbyoka tayi ka kala ko 25 Mai sigo 1 Juni nuumvo.
Omawuliko giipindi taga ithanwa Omaludi Festival otaga ka longekidha oshituthi shoka oshikando oshitiyali nuumvo.
Omunashipundi gwoshitayi oshinene moonoli shehangano lyoNCCI Tomas Iindji okwati okwa ndhindhilike kutya elelo lyomukunda Okongo olyo eshona komalelo agehe ashike oku uvite y alonga oshilonga oshinene sho ya tokola okuyapo nomawuliko giipindi oshoka nasho otashi gwedha ko koshimaliwa moshilongo.
“Oonda li nda tseyithilwa kutya momawuliko giipindi muka otamu ka kala woo aanafalama taya ulike iimuna nuunamapya oshowo aanafalama taya itulilemo omadhiladhilo nkene ye na okulonga nuunafaalama. Uunafalama owo esipa, oondjodhi nomuthigulwakalo gwetu’. Iindji ta ti ngaaka.
Ta gwedhapo okukaleka po uunamapya nuunimuna moshilongo opo wu ka kwatele monakuyiwa ongele taku tsikilwa oku dhigininwa okulongwa oshilongwa shuunamapya mosikola opo mboka yeli moosiko ya uvithweko uuwanawa nesimano lyuunamapya monakuyiwa.
Pomasiku ogo tuu ngoka, ohungi yokugongela oshimaliwa shomawuliko giipindi mOshakati oya gongele oshimaliwa shongushu yi vule N$850 000, sha ningwa mOlyomakaya ya zi ko ndjoka ya ningilwa mosaala yaUnam mOshakati.
Omawuliko giipindi ngoka gedhina Oshakati Totem Expo, otaga ka tameka momasiku 24 Mai sigo 01 Juni nuumvo mokapale koIndependence mOshakati, moka tamu ka kala wo oomawuliko gomazimo ga yoloka ge li 15.
Totem expo oya tamekele mo2012 nohayi etelele aawiliki yiiyetwa po oyindji okuza muNamibia alihe, osho woo omayinyanyudho ga kwata mitii okuza kaahikingalo, omathigathano gokakadhona dhingi niikwawo oyindji tayi nyanyudha.
Oshituthi shoka nuumvo otashi ka kala kohi yoshipalanyolo Okukoleka uukumwe okupitila momithigululwakalo. Nelalakano lyaayihe mbyoka okuyambula po ondoolopa yaShakati noku eta oshimaliwa mondoolopa yaShakati.
Esiku ndoka lyokugongengela oshimaliwa ombanga onene tayi ithanwa Standard Bank oyo yali ya iyamba okugandja oshimaliwa shakola shi thike poN$100 000, ya landulwa kuFysal Properties Developers nOshakati Town Council ya gandja N$50 000 omanga ombaanga onene yoBank Windhoek ya gandja N$30 000.
Omunangeshefa omunene Kornelius Ndjoba okwa li a kondjele ethano lyomukwanilwa kwa li gUukwanyama Mandume yaNdemufayo ndyoka lya li ly tameke okukondjelwa kooN$1 500 sigo e ke li landa po koN$15 000, omanaga ethano lyOmukwanilwakwali kwali gwUukwambi Ndilimani Iipumbu lya sindanwapo kOmupehaprimaminista Netumbo Nandi Ndaitwa kooN$3 500. Omunageshefa Herman Iipumbu okwa li a kondjele ethano lyomukwaniilwa kwa li gwaNdonga Nehale lyaMpinga kooN$5 000 ta ti ita vulu okukondjela ethano lyambushe oshoka okuga na ogendji.
Ndaitwa okwa li a ulike ohokwe nkene evute esimano lyomuthigululwakalo, o manga inatameka oku popya ondjokonona ye onguloshi ndjoka okwa li a itangomona nokufatulula ezimo lye.
“Oshilongo kasha na omuthigululwakalo osha fa ashike omuti kagu na omafo” Ndaitwa ta ti ngaaka. Ta gwedha po ta ti ota tsu omukumo aanangeshefa ayehe ya tsikile okukwathela iituthi ya tya ngaaka opo oshimaliwa shi gongale moondolopa.
Ethigathano ndika olya etwa po komaulikilo giipindi goShakati Totem Expo, ngoka ge li taga taandelitha omithigululwakalo dhomoshilongo, nokuhumitha eliko lyoshilongo pombanda.
Omauliko giipindi ngaka ohaga etelele aauliki yiiyetwa po yawo oyindji okuza muNamibia alihe, osho woo omainyanyudho ga kwata miiti okuza kaahikingalo moshilongo.
Ethigathano lyaMiss Totem Expo ohali ningwa kehe omvula pokati ka Mai naJuni, okutothamo omanzuna ngoka taga kalele po oshiindingili shika, hashi ningwa ishewe nelalakano lyokuyambula po iitalenti yoku enda unene kaadhana aagundjuka.