Eehangano lyiiyenditho moNamibia Road Authority (RA), olya patulula oombelewa dhawo oshilongo ashihe, sho dhali dha pata pa kathimbo oku ninga omayindilo, omolwa omukithi gwoCovid-19.
Omupopiliko moshikondo shiiyenditho Hileni Fillemon okwa ti, ehangano lyawo otali tsikile oku kondolola noku keelela etaandelo lyomukithi ngoka, oku indika omikweyo omileeleka.
“Oombapila dhomayindilo adhihe, otadhi ka tulwa moshipakete shili po miyelo dhoombelewa dhoNatis adhihe, oshigwana otashi ka tuminwa okatumwalaka okahupi okuza ko nomola 2000, oku koleka omayindilo gawo,” ta ti ngaaka.
Fillemon okwa indile kehe ngoka taka thika poombelewa dhoNatis, a gwanithepo omalandulathano noompango adhihe dha tulwa po oku yanda omawupyakadhi taga vulu oku taandaleka omukithi gwoCovid-19.
Taku magidha oshigwana ta ti, oshimaliwa itashi ka tulwa momapakete moka nenge tashi gandjwa po miyelo mpoka, ihe omafutilo agehe otaga ka ningwa meni lyoombelewa. “Ota tu indile kehe ngoka taka ninga omayindilo ngoka, opo a kwashilipaleke kutya okwa longitha oofoloma dhili mondjila, dhe yindilo ndyoka a hala,” ta popi ngaaka. Ta gwedhapo ta ti, kehe ngoka ombapila ye, ya felefala no kwali aningi omayindilo gwoku kahinga, oku mona omukanda, okuza momasiku lyotango lyaJuli sigo ga hetatu gaAguste, oya pewa ompito oku ningulula omayindilo sigo 31 gaAuguste.
“Ngoka taka pitilila omasiku ga zi noku tumbulwa oku ningulula omayindilo goku hinga, itaka pewa we ompito, ihe otaka thiminikwa okushangulula otutsa yo petame ko,” ta popi ngaaka. Filemon okwati, kehe ngoka taka ninga oomayindilo gwoku shanga otutsa yo petame ko, na kale uudhitha ofoloma ye mondjila o pamwe no kopi yo kamutse ke, ka dhengwa oshihako ko polisi.
Ta ti, omanga mboka taya ningi omayindilo go tutsa yoku hinga, nayo naya uudhithe oofoloma dhawo mondjila, o pamwe nompapila ye yo tutsa yo petameko oshowo okopi yokamutse ka dhengwa oshihako ko polisi.
Fillemon okwa kumagidha oshigwana shilongithe uukalata wuumbomba okufuta.
“Oshigwana nashi kale sha kotokela ookalyamupombo, mboka haya longitha oompito adhihe okuyuga aantu iimaliwa, unene ngele ta shiya poku konga omikanda,” ta kumagidha.
Ta ti, ehangano lyoNatis itali ka pula nando omuntu gumwe, oku longitha ooE-wallet, Easy-wallet oshowo o-blue okuninga omafutilo.