New Era Newspaper

New Era Epaper
Icon Collap
...
Home / Okukelela okudule okupanga …Ounona voumati va pewa omadeulo opo vaha kwatwe ovakainhu onghonga

Okukelela okudule okupanga …Ounona voumati va pewa omadeulo opo vaha kwatwe ovakainhu onghonga

2022-05-20  Festus Hamalwa

Okukelela okudule okupanga …Ounona voumati va pewa omadeulo opo vaha kwatwe ovakainhu onghonga
Top of a Page

Ovanafikola vounona woumati 30 ova pewa eedjapo konima eshi va mana omadeulo avo oo kwa li tava ningi oule weemwedi nhatu pofikola Oshifukwa Combined School moshitukulwa shaShikoto.

Ounona voumati ova kala tava pewa eetundi kehangano loProjet Hope Namibia eshi va kala tava pewa ehongo longushu nghee ve na okukala tave likaleke kokule nokulonga oilonga yoimbuluma ngaashi okukwatwa ovakainhu onghonga, okudipaa nosho tuu.

Elalakano lokuyandja eetundi kounona vofikola voumati okuxwaxwameka ovanafikola va kale ve na eudeko la wana nghee omulumenhu a pwambwa okukala te lihumbata ngeenge ta kulu.

Ovanafikola ova kala hava pewa eetundi konima ngeenge va mane neetundi davo dongula moinyangadalwa ya yooloka ngaashi okulongwa efimano louteku, nghee ve na okufimaneka ovakainhu noshoyo nghee omulumenhu e na okukala a amena oukadona. Moshipopiwa shaye, omunambelewawiliki wehangano loProject Hope Namibia Beauty Kwenda okwa ti oProject Hope otai lalakanena okuyandja ehongo kounona voumati opo vaha kwatwe komhepo yokulongela ovakainhu omahepeko omomaumbo.

Kwenda okwa ti ehangano lavo ola didilika ounona ovalumenhu ovo hava longo oimbuluma eshi hava kala tava longele ovakainhu ominyonena momaumbo onghee naashi osha eta opo ehangano li kale la ninga opologalama yokuyandja eetundi kounona voumati ve li meefikola.

“Ohatu lalakanene opo ounona voumati va kale ve na etilo Kalunga, va fimaneke ovakainhu shaashi ngeenge omulumenhu okwa kala a fimaneka omukainhu waye eshi otashi yandje omhepo iwa komulumenhu yokukala ita denge ovakainhu,” Kwenda ta hokolola. Okwa weda po ta ti eetundi tadi yandjwa kounona otadi kunghilile yoo vali ounona vovamati opo vaha kale itava shindi vakwao meefikola ile tava tumbula oitya ii.

Shipondo Johannes oye umwe a kala ta yandje omadeulo kovanafikola, okwa ti omadeulo okwa ende nawa eshi ovanafikola va kala ve litula mo moinyangadalwa yavo pefimbo lomadeulo.

Johannes okwa ti ovanafikola ova kala ve na ohokwe yokulongwa kombinga yonghalafano nghee omulumenhu e na okulihumbata eshi va kala havapula omapulo kombinga yomahepeko aa haa ningilwa ovakainhu.

Greson Arseri weedula 13, e li mondodo onhi-7 pofikola Oshifukwa Combined Schoolo okwa lombwela Kundana ta ti omadeulo okwa ende nawa shaashi ova pewa ouyelele wa fimana tau va keelele okukala tava longo oimbuluma.

“Otwa longwa opo tuha ningile ovakainhu oushada wopaixulo, shaashi eshi shi li sha nyika oshiponga neenghono, otwa longwa yoo vali tu kale twa fimaneka ovakainhu nounona voukadona,” Arseli ta ti.

Ndeshaanya Ndafimana naye oye umwe womwaava va pewa omadeulo nokwa hokolola ta ti ova pandula unene ehangano loProject Hope Namibia eshi la tota po opologalama ei yokukala tai deula ounona voumati nghee ve na okulihumbata.

fhmalwa@nepc.com.na


2022-05-20  Festus Hamalwa

Share on social media
Bottom of a page