Moule weedula heyali, oministeli yomudingonoko noixwa oya teta eemhanda da fika po2 500 moshilongo ashishe. Eemhanda edi oda pula omwaalu woimaliwa ya fika peemiliona N$50.

Oshingwanima eshi osha ningilwa okukelela oukongo woinamwenyo uhe li paveta.  Okudilila kepandja lopamulungula halu ufanwa “Save the Rhino Website”, Namibia osho oshilongo shotete hashi longifa omukalo wokuteta ko eembinga deemhanda opo va dule okukelela oukongo woinamwenyo kau li paveta.

Minista yomidingonoko noixwa Pohamba Shifeta, okwa popya kutya omukalo woludi la tya ngaha oo ashike ve na okulongifa okuamena oinawenyo yoludi eli opo iha vakwe po. 

“Nonande omukalo woludi eli u na ondilo katu na nghene tu na okuninga,” Shifeta ta ti. Shifeta okwa tumbula kutya ohashi va pula oimaliwa ya fika poN$18 000 fiyo N$20 000 opo va dule okuteta omhanda imwe eembinga. 

Oilonga ei ihai pula lela efimbo lile okulonga, ohai pula ashike nande oule wominute 20. “Omukalo ou oo ashike tu na okuya nao komesho opo tu dule okuamena eemhanda detu,” Shifeta ta weda po. 

 Elalakano likwao lokuteta eembinga deemhanda edi, okufifa eembudi edi hadi vake eembinga deemhanda ounye. “Omunhu ke na eshi ta longifa omhanda ihe na eembinga,” Shifeta tati.  Okuteta eemhanda eembinga, okukelela yoo natango oiponga koinamwenyo ikwao ngeenge tai lu shaashi otai dulu okulidipaya, Shifeta ta ti. 

Eembinga edi da tetwa keemhanda edi ohadi ka tuvikilwa koministeli yoovene, di li koshi yeameno la kwata moiti da teelela di ka landifwe po. Ohashi pula omwaalu weemiliona nhee okulandifa ombinga imwe yomhanda. Shifeta okwa tumbula yoo kutya oinamwenyo ei oi na onyala yakula mokuyambidida meliko lepangelo shaashi ohai eta oshimaliwa shihapu.

Shifeta okwa popya yoo kutya oinamwenyo ei ya idililwa oya amenwa koukongo woinamwenyo kau li paveta. Epangelo otali longele yoo kumwe noovene veefaalama dopaumwene ava ve na oinamwenyo yomeefuka opo va dule oku i namena.  

Odula ya dja ko okwa lopotwa eemhanda da fika po80 da vakwa meefaalama depangelo ndele eembudi edi ohadi monika ashike nokutulwa moipandeko. “Fyee ohatu kana ashike ngeenge omunhu a vaka eemhanda daye ndele ta pitile moixwa,” Shifeta ta ti. Okwa lopotwa yoo kwa kwatwa ovanambelewa, omo mwa kwatelwa ovakwaita, mekwatafano lokupitifa oukongo uhe li paveta.