Omukainhu weedula 25 ou e li moshipangelo shaShakati a kalela okaana kaye keedula mbali oko vati ka tuwa nombele nokutekela ombele momutwe wako ota hokolola ta ti hanga okaana kaye ka fya eshi ka tuwa.
Okwa ti kakwa li e shi ngeenge okaana kaye otaka xupu shaashi ombele okwa li ya tekela mo ya ya mokule onghee naashi osha ka eta opo va tuminwe koshipangelo shaShakati.
Martha Tsam ou e li omukalimo womodoolopa yaTsumeb okwa ti okwa nukilwa komufekelwa eshi kwa li ta kendabala oku mu nyeka ongodi yaye noku mu pula oshimaliwa.
Oshiningwanima eshi osha ningwa Etivali modoolopa Tsumeb efimbo lokonguloshi lwoopotundi 20h00 popepi nondingosho Vision Bar.
“Onda hangika nda kuminina okaana kange, ame vali ondi na eteelelo lemwedi hamano. Okwa denga nge enghava moshipala nongonyo mekofi ndele tandi lidenge po nokaana kange ke li modikwa,” ta hokolola
Pefimbo Kundana a talela po Tsam koshipangelo Etine okwa hokolola ta ti okwa li tave ende nomumwainakadona va uka keumbo tava di keumbo laxekulu efimbo lokonguloshi.
Okwa ti manga ve li mondjila tava ende ponhele palaula ova nukilwa komufekelwa ashike mumwainakadona okwa faduka po diva eshi a mona omufekelwa oo.
“Ame kakwa li handi dulu okulotoka shaashi ondi na eteelelo nokaana modikwa,” Tsam ta ti.
Okwa ti okudja opo omulumenhu okwe mu twa nombele mekofi nomokwooko nokonima okwa katwa okaana.
“Onda kuwa mokule fiyo ovanhu ava va li ve li pondingosho yoVision Bar tave uya okuyambidhidha nge ashike omufekelwa okwa faduka po a uka momilaulu,” ta hokolola.
Okwa yelifa ta ti okaana kaye oke li monghalo i li xwepo paife nombele ei kwa li ya tekela momutwe wako oya kufwa mo.
“Naame ondi li nawa paife nande nda mona oshiponga mokwooko nokekofi. Ohandi pandula kalunga eshi twa xupa moshiponga shaashi hanga twa dipawa,” ta ti.
Omulumenhu waye ou e li oye xee yokaana Stansley Noibeb weedula 27 naye okwe uya koshipangelo shaShakati opo a kale ta yambidida omukainhu waye.
Noibeb okwa lombwela Kundana ta ti okwa hangika e li koilonga pefimbo loshiningwanima eshi ashike okwa ka dengelwa ongodi kutya omuholike waye nokaana ova mona oshiponga.
Okwa lombwela Kundana ta ti okwa uda nayi eshi omufekelwa a twa okaana kaye kehe na eshi ka ninga.
“Onda ninga onghendabala opo ndi uye kOshakati ndi kale nomuholike wange. Ohandi nangala ashike pondje yoshaala nde lituvikila ekumbafa limwe ashike,” Noibeb ta ti.
Onghee okwa ti ke na nghee shaashi okwa hala okukala e li popepi nomuholike nokaana kaye. Ovadali ava ova indila opolifi opo i kale ya kwata po omufekelwa ou diva shaashi okwa longa oshimbuluma sha kula.
Komufala wopolifi mOshikoto Commissioner Teopoline Kalompo-Nashikaku okwa ti opolifi otai indile moshiwana kwaau e na ouyelele kombinga yomufekelwa ou a longa oshimbuluma opo shi kale sha lopotela opolifi diva.