Oshiwike sha zi ko oongeleka monooli odha li dha galikanene pamwe opo omvula yi loke miitopolwa ayihe yoshilongo.

Apostoli Selma Kandume gwomOshakati okwa ti, Pamba aluhe oha yamukula uuna ta indilwa.

“Omvula oya ningi ethimbo tayi loko miitopolwa yimwe ashike yoshilongo, ihe yimwe okwa li ya kukuta, niimuna oya li ya tameke okusa kondjala,” Kandume ta ti ngaaka.

Ta ti, koshitopolwa shaKunene hoka kwa li kwa lopotwa kwa ponokelwa kondjala nako okwa li kwa lokwa nawa oshiwike sha zi ko.

“Natu tsikileni okugalikanena pamwe, Kalunga oha yamukula mbala ngele ta indilwila mehwata,” ta kumagidha.

Nonando oyendji ya kala ye na uumbanda kutya omvula nuumvo itayi loko we monooli, okuza oshiwike sha zi ko, oye ga tilehi pevi miitopolwa oyindji yomonooli.

Kundana sho a li a talele po iitopolwa ya yooloka ngaashi Ohangwena, Omusati nOshana omvula oya loko nawa miitopolwa moka, shoka shi li oshinima oshiwanawa koyendji osho wo kiimuna.

Maria Shikongo, a yambukile momukunda Onaanda okwa ti, omvula oya loko okuza uusiku wEtine awuhe sigo ongula yEtitano. 

“Omvula oya loka nawa noya li ya sheka lwopotundi 07h00 lwaampoka.

Shikongo ta ti, iilya mbyoka ya li inayi sa komutenya otayi monika nawa, tayi ulike ya talala nawa.

“Okwa li twa longa nuudhiginini nuumvo, ashike omvula ndjoka ya ningi ethimbo inaayi loka, iilya yetu oyindji oya sa po komutenya. Ashike otatu pandula oshoka iimuna yetu oya silwa ohenda,” a popi ngaaka.

Shikongo okwa kumagidha aanafalama aakwawo, ya tsikile okugalikanena pamwe opo ya mone natango omoloka omwaanawa kiitopolwa ayihe yoshilongo.

Omvula ndjoka ya loko oshiwike sha zi ko, oyu udhitha iishana omeya, nomwiidhi ogwa zizi nawa opendji.

Kiitopolwa yimwe yoshilongo otayi hokololwa nayo ya mona omvula nonando ohayi pititha po omasiku omanga inaayi tsikila okuloka.

Ta gwedhapo ta ti, momagalikano gawo otaya indile wo natango omukithi gwoCovid-19 gu hule po thiluthilu, ngoka kwa li gwa ponokele oshilongo omumvo gwa yi, nogwa faalele oomwenyo odhindji muuyuni awuhe.