Ehangano lyokutunga omagumbo lyoNational Housing Enterprise (NHE) olya pula oshigwana shi ninge omaindilo gokulanda omagumbo moondoolopa dhili ne moshilongo.

NHE ota landitha omagumbo ge li 241 moondoolopa Otjiwarongo, Outapi, Omuthiya oshowo Okahao.

Ndhoka okwa li dha popiwa komunambelewapitithi Taufi Shafombabi, ta ti, omagumbo ngoka oga tungwa pashinanena.

“Kehe ngoka a hala nenge e li mompumbwe yegumbo, okwa manguluka okuninga eindilo muyimwe yomoondoolopa ndhoka dhi Ii ne,” ta fatulula ngaaka. Ta ti omagumbo ngoka oga tungwa ge li pamaludhi goondunda mbali nenge ndatu dhokulala, sha ikwatelela kuunene wegumbo ndyoka omulandi a hala.

‘’Omagumbo oge na oondando okuza N$394 365 sigo N$500 000, sha ikolelela kongushu yegumbo ndyoka omulandi a hala,’’ ta fatulula ngaaka.

Ta ti ehangano otali ka landitha omagumbo ngoka, onga oshinakugwaitha shehangano lyo-NHE okugandja omagumbo moshigwana.

Ta gwedha po kutya omagumbo kOutapi oge li pokupwa, omanga gomoondoolopa Omuthiya, Otjiwarongo nOkahao opo taga tamekwa, onkene oshigwana otashi indilwa shi ninge omayindilo.

Shafombambi okwa ti, ngele gumwe a hala okuniga omayindilo na faalele okambapila kiiyemo ye yokomwendhi, komwendhi wa hugunina, ombapila yomayalulo gombaanga yoomwendhi ne oshowo onzapo tayi ulike kutya oho futu otakisa.

‘’Kehe ngoka a hala okuniga omayindilo na thike poombelewa dhetu oonene pOshakati oshowo Katutura nenge ya dhenge koonomola on 065 229 150, 061 276 100,” ta ti ngaaka.

Oshigwanaa osha taalela oompumbwe dhomalukalwa, onkene NHE okwa longekidha omagumbo ngoka okukandula po uupyakandhi wa yamwe nonando haayehe poshikando shimwe.

Ya ti, otaya tsikile okutungila oshigwana omagumbo, notaya kala taya tseyithile oshigwana aluhe shi ninge omayindilo.

– vkaapanda@nepc.com.na