New Era Newspaper

New Era Epaper
Icon Collap
...
Home / Omagumbo mEhenye kohi yomeya

Omagumbo mEhenye kohi yomeya

2021-03-26  Victoria Kaapanda

Omagumbo mEhenye kohi yomeya

Victoria kaapanda

Konima omvula sho ya ningi omasiku tayi loko, omagumbo gomEhenye mOshakati oga thigwa kohi yomeya, naakalimo otaya nyenyeta kutya onkambadhala ya ningwa kelelo lyondoolopa yaShakati inali ya kwathela ayehe.

Magano Salomon ngoka e na egumbo mEhenye okwa ti, egumbo lye olya dhingolokwa komeya, niihauto itayi vulu okuya mo meni oshoka otayi dhama montopo.

“Kehe esiku tatu yi kiilonga otatu ende momeya, oshoka ohofa ayihe oya pwa ko komeya. Aanona yetu kaye li we megameno oshoka otwa tila ya se omeya,” Salomon ta ti ngaaka.

Ta ti, elelo lyondoolopa yaShakati nali ninge po onkambadhala yomeendelelo, oshoka oya tila natango omakuma gawo ga tende omisa sho ga dhingolokwa komeya.

“Naye tu pe omavi, otatu mono iihuna. Omeya otaga nyanyalitha, momagumbo getu katu li mo twa manguluka,” a popi ngaaka.

Salomon ta ti, omvula ohayi loko kehe esiku nomeya otaga ende ga uka pombanda kehe esiku.

Omugandji gwomawuyelele melelo lyondoolopa lyaShakati Katarina Kamari okwa ti, elelo lyondoolopa olya kambadhala okutha omalambo, moka omeya taga ende, opo ga landule ondjila yago yimwe.

“Mboka ye na omagumbo ge na omeya naya kambadhale okulanda omavi, oshoka tse omavi ohatu ga tula ashike momapandaanda, ihe hameni lyoohofa,” a popi ngaaka.

Kamari okwa kumagidha oshigwana kaashi kwatwe kuumbanda wefundja, oshoka elelo olya longekidha ondjila yomeya moka taga ende.

Ta ti, omeya ngele oge ya ogendji, itaga talama ngaashi shito, sho haga talama miishana sigo taga thiki momalukunda.

“Omeya otaga landula ondjila yago,  sigo taga yi hoka ga uka, itaga talama we nenge ga andjaakane sigo omomagumbo gaantu. Oontopa adhihe odha patululwa,” ta ti ngaaka.


2021-03-26  Victoria Kaapanda

Share on social media